Partia Demokratike ka përshëndetur vendimin e Gjykatës Kushtetuese në lidhje me Teatrin Kombëtar. PD kërkon hetim penal ndaj çdo zyrtari publik të përfshirë në shembjen e teatrit, duke filluar nga kryeministri Edi Rama dhe kryetari i Bashkisë Erion Veliaj. Përmes Sekretarit të Përgjithshëm të Partisë Demokratike, Gazment Bardhi tha se vendimmarrja e sotme e Gjykatës Kushtetuese është vetëm hapi i parë, prova e pakundërshtueshme për abuzimin me pushtetin nga Edi Rama dhe Erion Veliaj.
“Ky vendim merr në mbrojtje Teatrin Kombëtar, duke e cilësuar si një pasuri që përbën trashëgimi kulturore të Shqipërisë. Shkaktarët e kësaj plage janë ata që penguan dhunshëm ndryshimin në 25 prill dhe që mbajnë peng vendin prej 8 vitesh me arrogancë, korrupsion, klientelizëm, paratë e krimit dhe armiqësinë e verbër ndaj trashëgimisë kulturore, ndaj çdo pasurie të kombit tonë. Vendimmarrja e sotme e Gjykatës Kushtetuese është vetëm hapi i parë, prova e pakundërshtueshme për abuzimin me pushtetin nga Edi Rama dhe Erion Veliaj. Autorët e këtij krimi të rëndë kushtetutes dhe ligjor, me pasoja të rënda për interesin publik dhe pasurinë tonë publike, kanë emër dhe mbiemër, janë të gjithë të identifikuar dhe duhet të mbajnë përgjegjësi të plotë përpara ligjit. Ata janë Edi Rama dhe Erion Veliaj”, tha ai.
Ndërkohë edhe deputetja e Partisë Demokratike, Jorida Tabaku ka reaguar lidhur me vendimin e Gjykatës Kushtetuese. Me anë të një postimi në rrjetet sociale, ajo u shpreh se ky vendim tregoi sipas saj padrejtësinë që u bë ndaj teatrit. Ajo theksoi se nëse ndërmerren akte të mëtejshme sipas saj do të jenë kriminale.
“Vendimi i Gjykatës Kushtetuese dëshmoi padrejtësinë, korrupsionin, babëzinë, abuzimin në të cilën vepruan Rama dhe Veliaj teksa shembën godinën e Teatrit në 17 maj. Dinjiteti i qytetit dhe qytetarëve duhet vendosur në vend. Çdo akt i mëtejshëm është akt kriminal në dëm të qytetit dhe qytetarëve”, tha Tabaku.
Diskutime rreth kësaj post