Një ndër personat e shumtë që nuk është dakord me paketën e trajnimit profesional” të Ermal Mamaqit dhe me çmimin e shtrenjtë është kryetari i nismës Thurje, Endri Shabani, i cili shprehet se e vetmja pjesë që inkurajon është pjesa që ai ka qenë kamerier.
“Ne duhet të jetojmë në një shoqëri ku duhet thënë se edhe kamerieri mund të ketë sukses. Por ajo që s’më pëlqen është pabarazia. Të gjitha gjërat që ofron paketa e Ermalit, është se ka institucione të veçanta që i bëjnë këto gjëra.
Ermali nëse do u mësonte të rinjve se si të aktrojnë, jam dakord. Por nuk është i specializuar për të gjithë. Ka psikologë profesionistë që ndihmojnë njerëzit për të administruar veten. Ajo që Ermali ofron është një mjek popullor. Me pak fjalë largon njerëzit nga shkenca dhe i dërgon te njerëz të tillë”, tha Shabani.
Sipas tij, paketa ofrohet në lagjen ku jeton elita e qytetit, të cilëve Ermali u shërben. “Thelbi është se kur protestonin studentët, Ermali i bënte makijazh kryeministrit”, vijoi Endri.
“Ka njerëz që mund ta përballojnë këtë paketë. Por ka njerëz që i sjellin shumë më shumë shoqërisë, kontribuojnë dhe lodhen më shumë dhe në fund nuk mund të blejnë një shtëpi. Kjo i ka irrituar njerëzit, çmimi”, tha Shabani.
Ky i fundit shtoi se ajo çfarë e shqetëson është “lufta kundër intelektualizmit”. “Ky koncepti se mendimi i një shkencëtari është i barabartë me një të mediokri, kjo më shqetëson. Je me kancer, del njëra e thotë mos bëj kimioterapi. Kemi njerëz që studiojnë trupin e njeriut, që studiojnë për viruset, barazohen me një që del në internet dhe thotë një gjë të tillë”, tha Endri.
Ai shto se edhe ata që do paguajnë për trajnimin e Ermalit, në fund nuk është se të gjithë do të bëhen të suksesshëm.
“Kamerierit i duhet të marrë kredi dhe në fund nuk do të bëhet i suksesshëm. Ermali nuk po vjedh, por edhe ne kemi detyrën tonë që ta diskutojmë dhe të themi se jo të gjithë do të bëhen të suksesshëm. Ermali është i suksesshëm si komedia. Kam qeshur me humorin e tij. Nëse do të bëhet psikolog, le të studiojë. Në biznes Ermali nuk ka çfarë t’i japë të rinjve”, përfundoi ai.
Diskutime rreth kësaj post