Tashmë nuk përbën më asnjë çudi që klasa e vjetër politike e tranzicionit favorizon oligarkët. “Ujqërit” e veshur me pushtet që kanë vite që mbretërojnë, i kanë ushqyer dhe elefantizuar në kurriz të taksapaguesve shqiptarë dhe pasurive të Shqipërisë në tokë e nëntokë. Sa prona i kanë rënë “në prehër” këtyre oligarkëve duke llogaritur vetëm ato të denoncuara në media, apo duke parë dhjetëra VKM- të e ligjet e pushtetit Berisha, apo dhe të 11 viteve të qeverisë “Rama” që kanë bërë që atyre t’i plotësohet çdo dëshirë, duke vendosur pasuri marramendëse.
E njëjta situatë ka ndodhur edhe me Samir Manen, i cili falë lidhjeve të shumëfishta me Edi Ramën kontrollon gjithçka që prodhon para në Shqipëri. Ai është klienti më i madh i kryeministrit Rama. Gazeta “SOT” do të tregojë me detaje se pse Samir Mane është i përkëdheluri i qeverisë socialiste. Ekonomia jonë është e fundit në rajon, me borxhin më të lartë publik, me papunësi dhe varfëri të shtuar, por kjo nuk e ndal Edi Ramën që të vendosë në shërbim të oligarkut Samir Mane që ka privatizuar kufij, bregdete, porte e miniera, e çdo pasuri kombëtare edhe para nga bankat evropiane për të zgjeruar aktivitetin e tij.
Si po favorizohet Samir Mane?
Gazeta “SOT” raportoi pak ditë më parë se Banka Evropiane për Rindërtim dhe Zhvillim (BERZH) dha 26 milionë euro kredi klienteliste për Samir Manen për ndërtimin e hotelit në fshatin e tij turistik, ku garant për oligarkun me faktet që do të rendisim del se është vetë Edi Rama dhe qeveria e tij. Shqipëria është partnere në këtë strukture dhe ka rol ekzekutiv pranë kësaj banke. Kryeministri ka nënshkruar një marrëveshje me këtë bankë disa vite më parë me skemën që u ndoq për Samir Manen, ku Banka Europiane vendos garanci në bankat e nivelit të dytë si formë lehtësie financimi për mbështetjen e agrobiznesit.
“Përmes skemës së re që kemi përpunuar, qeveria do të vendosë Fondin e Garancisë dhe bankat, me të cilat kemi pasur një bashkëpunim shumë të mirë për këtë projekt, do të sigurojnë kreditimin me riskun e marrë përsipër nga fondet e garancisë dhe me interesa deri në zero”, tha Rama në atë kohë. Nga ana tjetër Rama tha se Fondi Kombëtar i Garancisë në Bujqësi, të cilin e mbështeti BERZH-i me 100 milionë euro, financoi fermerët, ku si përqindje e investimit në këtë sektor ishte 50% me 50%, ku 50% të investimeve e bën qeveria dhe 50% bankat. Por ndërsa në rastin e bujqësisë, skema nuk rezultoi në nxitjen e kredisë, më vonë instrumenti i marrëveshjeve për ndarjen e riskut u shtri edhe në sektorë të tjerë të ekonomisë, përfshirë energjitë e rinovueshme dhe turizmin.
Në këtë rast BERZH do të shlyejë gjysmën e shumës për bankën e nivelit të dytë në Shqipëri në rast se investimi i hotelit në Palasë dështon dhe kredia nuk kthehet nga Samir Mane. Për oligarkun këtë herë kjo skemë kredie funksionoi shumë mirë, ndërsa për fermerët jo dhe për këtë sërish është kujdesur vetë shteti. Ekspertët e bujqësisë kanë dhënë alarmin se ka shumë burokraci dhe nuk ka informim të duhur nga shteti, njësoj siç ndodhi me fondet e AZHBR, të cilat u grabitën nga qeveria “Rama” dhe shkuan si investim për vilat e qytetarëve. Për Manen, i cili është dhe një person nën hetim nga SPAK,pasi akuzohet se ka ndihmuar në pastrimin e parave për Arben Ahmetajn dhe Ilir Metën, bankat janë treguar shumë bujare, pasi në këtë rast ka dalë vetë Edi Rama garant.
Ja ndihmat e tjera të Ramës
Kjo nuk është hera e parë që Edi Rama ka favorizuar oligarkun Samir Mane, kur bëhet fjalë për kreditë në banka. Ky i fundit ishte një nga përfituesit më të mëdhenj të kredive të subvencionuara nga Rama për përballimin e pandemisë së COVID-19, duke thithur gati gjysmën e fondit të miratuar nga bankat. Për kompaninë Albchrome, që ishte në pronësi të Manes në atë periudhë u miratuan dy linja kredie me vlerë totale prej 410 milionë lekësh, nga të cilat u tërhoqën 62.2 milionë lekë. Albchrome nuk ishte kompania e vetme e oligarkut që përfitoi kredi të subvencionuar nga buxheti i shtetit gjatë krizës së COVID-19. Pjesë e programit të garancisë sovrane u bënë edhe kompanitë Neptun, Fashion Group Albania dhe Kid Zone, të treja në pronësinë e grupit Balfin, duke e renditur Manen si përfituesin e dytë më të madh nga skema e garancisë sovrane me 482.5 milionë lekë të miratuara dhe 83.4 milionë lekë të disbursuara gjithsej në atë kohë.
Diskutime rreth kësaj post