Ish-presidenti Bujar Nishani shprehet se lideri demokrat Lulzim Basha duhet të mbante përgjegjësi për humbjet që ka pësuar Partia Demokratike nën udhëheqjen e tij.
“Në bindjen time, në kulturën time politike, e para më e rëndësishme është fati i PD, sepse fati i PD është i lidhur me fatin e Shqipërisë. PD është alternativa qeverisëse. Jam besimplotë që shumica dërrmuese e shqiptarëve mendojnë që qeverisja aktuale e ka çuar vendin në kaos dhe regres. I vetmi mekanizëm kushtetues, i mundshëm për të ndryshuar këtë realitet është sistemi politik, duke qenë se PD gjatë kësaj beteje, që nuk fillon sot, por tetë vjet, rezultoi e dështuar për ta rrëzuar Edi Ramën. PD ka një përgjegjës, i cili është kryetari, lideri i saj. Për të pasur një mundësi, PD, si i vetmi mekanizëm për të rrëzuar këtë qeveri është PD, por duke patur një ridimensionim të saj, një ekip të ri, i cili duhet të bëjë atë që nuk u bë”, tha Nishani.
Gjatë fushatës elektorale, shtoi Nishani, strukturat e PD nuk ishin të organizuara dhe të mbështetura financiarisht.
“Ajo që kam shprehur si shqetësim është fakti që edhe në kulturën evropiane, një lider që humbet del para mbështetësve dhe merr përgjegjësi. PD gjatë fushatës nuk e kontrollonte dot territorin sepse strukturat ishin të pambështetura, të pafinancuara, të paorganizuara. Kjo ka qenë një nga elementet që është përgjegjësi e lidershipit”, tha Nishani për Vizion Plus.
Diskutime rreth kësaj post