Zidane nuk është i brengosur për Cristianon

Zidane nuk është i brengosur për mungesën e golave nga Ronaldo.

Katër herë fituesi i “Topit të Artë”, Cristiano Ronaldo, nuk arriti të shënojë asnjë gol në fitoren e Real Madridit prej 2:1 ndaj Alaves.

Portugezi goditi dy herë shtyllën, por nuk e dërgoi topin në rrjetë që vazhdon t’i mungojë goli këtë edicion në La Liga.

Por, pavarësisht mungesës së golave, Zidane nuk është i brengosur për CR7 dhe ka lavdëruar për paraqitjen ndaj Alaves.

“Cristiano luajti ashtu siç bën gjithmonë. Kur nuk shënon, ju filloni të pyesni për të. Nga ai priten gola, por është ende herët dhe sezoni është i gjatë. Ai do të përfundojë sezonin duke bërë diferencën”, tha Zizu.

“Më pëlqeu pozita ku luajti dhe mënyra se si luajti. Ronaldo mund të luajë në shumë pozicione. Bëri paraqitje të mirë, por nuk ishte me fat, topi nuk deshi të hyjë në portë”, shtoi Zidane.