Tensionet në Lindjen e Mesme, Donald Trump shqyrton mundësinë e bashkimit me Izraelin për të sulmuar centralet bërthamore të Iranit

Presidenti amerikan Donald Trump po shqyrton mundësinë që Shtetet e Bashkuara të bashkëpunojnë me Izraelin për të goditur objektiva bërthamore iraniane, përfshirë edhe kompleksin në Fordow, raportojnë mediat ndërkombëtare.

donald trump

Diskutimi rreth këtij skenari pritet të zhvillohet në dhomën e situatave emergjente (Situation Room) në Shtëpinë e Bardhë.

Megjithatë, raportohet se nuk ka ende një dakordësi të plotë mes këshilltarëve më të afërt të presidentit për këtë hap të mundshëm.

Udhëheqësi i shumicës në Senat, John Thune, u shpreh skeptik për një votim të shpejtë në Senat për të miratuar një veprim të tillë. Sipas tij, presidenti Trump aktualisht “vepron brenda autoriteteve të tij” për të marrë masa.

I pyetur nëse Kongresi duhet të ketë fjalën e vet për çdo sulm të mundshëm ndaj Iranit, Thune tha se “po i paraprijmë ngjarjeve”, por nuk e përjashtoi mundësinë që Kongresi të përfshihet më vonë në procesin vendimmarrës.

Nga ana tjetër, senatori republikan Lindsey Graham theksoi se presidenti Trump duhet të marrë një vendim “shumë shpejt” në lidhje me ndihmën ndaj Izraelit. Sipas raportimeve të CNN, Graham i ka kërkuar personalisht presidentit në një bisedë telefonike të ndërmarrë një qasje të plotë për të ndalur programin bërthamor të Iranit, duke përfshirë edhe përdorimin e forcës ushtarake amerikane.

“Unë i thashë presidentit: ‘Kjo është një moment historik. Katër presidentë kanë premtuar se Irani nuk do të ketë armë bërthamore. Ti mund ta mbash këtë premtim,’” deklaroi Graham, duke kujtuar bisedën e tyre të së hënës. “Nëse duhen bomba, madje edhe bunker buster, le të përdoren. Nëse duhet të fluturojmë krah për krah me Izraelin, le të bëhet. Pasojat e një dështimi janë të jashtëzakonshme.”

Ndërkohë, kryetari i Komisionit për Marrëdhënie me Jashtë në Senat, Jim Risch, e vlerësoi presidentin për “menaxhimin e një situate shumë të ndërlikuar”, duke shtuar se Trump po konsultohet vazhdimisht me ekspertë të Kongresit dhe informohet në mënyrë të rregullt.

Edhe senatori Tommy Tuberville theksoi se Kongresi duhet të ketë një rol në çdo vendim për veprim ushtarak ndaj Iranit. “Duhet të kemi njëfarë fjale në këtë. Sidomos nëse situata mund të çojë drejt një Lufte të Tretë Botërore, sepse rreziku është real,” tha ai.