Ministria e Jashtme e Rusisë, ka reaguar pas zgjedhjes së pesë shteteve si anëtare jo të përhershme të Këshillit të Sigurimit të OKB-së, mes të cilëve edhe Shqipëria.
Përmes një deklarate, ministria bëri me dije se e mirëpret pjesëmarrjen e këtyre shteteve në punën e Këshillit, dhe se Rusia është e gatshme për ndërveprim të ngushtë, shkruan agjencia ruse e lajmeve, Tass.
“Ne presim pjesëmarrjen e atyre shteteve në punën e Këshillit për të ndihmuar forcimin e rolit qendror koordinues të KB në çështjet globale, për të rritur ndikimin dhe efikasitetin e saj. Pala ruse është e gatshme për ndërveprim të ngushtë me anëtarët e rinj të Këshillit të Sigurimit në mënyrë që t’i përgjigjet me sukses sfidave dhe kërcënimeve në paqen dhe sigurinë globale.”, – tha ministria.
Shqipëria, Brazili, Gaboni, Gana dhe Emiratet e Bashkuara Arabe do të bëhen anëtare të reja jo të përhershme të Këshillit të Sigurimit të KB më 1 janar 2022. Ata do të zëvendësojnë Vietnamin, Nigerinë, Shën Vincentin dhe Grenadinet, Tunizinë dhe Estoninë, të cilët kanë qenë Anëtarët e KS të KB që nga janari 2020.
Këshilli i Sigurimit i KB ka pesë anëtarë të përhershëm dhe dhjetë jo të përhershëm, të cilët zgjidhen për një mandat dy-vjeçar. Zgjedhjet mbahen çdo vit për të zëvendësuar pesë në dhjetë anëtarë jo të përhershëm.
Diskutime rreth kësaj post