Hasan Halili, ish-kryetar i Bashkisë së Kukësit, është shpallur në kërkim. Ai akuzohet se ka shpërdoruar detyrën dhe gjykata dha masën e ndalimit “arrest me burg”, por ish-kryebashkiaku nuk është gjetur në banesë.
Ndërkohë janë ndaluar disa nga bashkëpunëtorët e tij si Mirdash Hoxha, ish-drejtor i Drejtorisë Rajonale të Tatimeve; Lekë Deda, ish-drejtor i Financës pranë Bashkisë Kukës; dhe Gëzim Ukperaj, ish-drejtor i Borxhit në Drejtorinë Rajonale të Tatimeve.
Sipas prokurorisë së qarkut verior, këta persona, në bashkëpunim me njëri-tjetrin, kanë kryer një seri veprimesh fiktive, duke e regjistruar Bashkinë Kukës si aksionere në shoqërinë “Klubi i Futbolli Kukës Sh.A”, për të cilën më pas kanë paguar në mënyrë të paligjshme, në formë sponsorizimi, në periudhën 2011-2015 rreth 45 milionë lekë.
Këtë shumë, Bashkia e Kukësit e ka siguruar duke mos paguar kontributet shoqërore dhe shëndetësore për pjesën më të madhe të punonjësve në varësi të institucionit. Kreu aktual i bashkisë bëri padi pasi u gjet se pagesat e sigurimeve nuk ishin realizuar.
Sipas prokurorisë, shoqëria “Klubi i Futbollit Kukësi” është krijuar në vitin 2011, si një shoqëri tërësisht private. Në vitin 2012, me një vendim fiktiv, me kërkesë të kryetarit të asaj kohe, Bashkia Kukës u regjistrua si aksionere e kësaj shoqërie, pa asnjë bazë ligjore.
Veç kësaj, ekipit iu dhanë 45 milionë lekë dhe hetimi provoi se këto pagesa ishin kryer tërësisht në kundërshtim me ligjin.
Diskutime rreth kësaj post