Shifra dhe fakte: Shqipëria, e dyta në Europë për numrin më të vogël të viktimave nga koronavirusi, e para për masat shtrënguese

Shqipëria mbylli javën e 11të që nga rasti i parë pozitiv i konfirmuar me sëmundjen e Covid-19. Në mbyllje të javës së 11të të prekurit kaluan numrin 1000. Janë 1004 vetë pozitivë. Në javën e fundit janë 59 raste të reja pozitive.

Janë kryer 13333 testime molekulare me shkallë të përgjithshme pozitiviteti 7,5 %.

Kanë ndërruar jetë 32 vetë. Shkalla e fatalitetit të rasteve është 3,2 %.

Deri tanë janë shëruar 795 vetë apo 79,2 % e të prekurve.

Në raport me popullsinë qarku më i prekur është qarku i Durrësit. Ndërsa Gjirokastra është qarku me asnjë rast pozitiv.

Me 351 të prekur për 1 milion banorë (2,845,000 vetë popullsia e Shqipërisë në 1 janar 2020 sipas INSTAT), Shqipëria renditet e katërta në Europë midis vendeve më pak të prekura pas Greqisë (276), Sllovakisë (276) dhe Bullgarisë (347).

Me 11 fatalitete për 1 milion banorë, Shqipëria renditet e dyta në Europë midis vendeve më numrin më të ulët të fataliteteve për 1 milion banorë pas Sllovakisë (5).

Është ende shpejt për të bërë një vlerësim të përgjithshëm për përparësitë e qasjeve të ndryshme të vendeve që u prekën më pak se të tjerët nga Covid-19. N

dërthuren disa faktorë njëherësh përfshirë demografinë, profilin epidemiologjik të vendit, pozicionin gjeografik, modelin e sistemit të kujdesit shëndetësor, kapacitetet e sistemit të kujdesit shëndetësor, strukturën familjare, etj, etj. Por edhe masat administrative në frenimin e përhapjes së sëmundjes luajnë rolin e tyre.

Grafiku në vijim ilustron intesitetin e masave shtrënguese të imponuara nga qeveritë e vendeve përkatëse në 60 ditët e para që nga zbatimi i masës së parë shtrënguese. Krahasohen Shqipëria (AL – masa e parë shtrënguese daton 25 shkurt), Greqia (GR – masa e parë shtrënguese daton 25 shkurt), Italia (IT – masa e parë shtrënguese daton 23 janar), Serbia (SRB – masa e parë shtrënguese daton 22 janar), Suedia (SWE – masa e parë shtrënguese daton 9 mars) dhe Gjermania (D – masa e parë shtrënguese daton 24 janar). Përzgjedhja e 6 vendeve është qasje arbitrare e imja. Ndërsa numri në kllapa përmbri emërtimit të vendit në legjendë tregon numrin e fataliteteve nga Covid-19 për 1 milion banorë në 24 maj 2020. Për të përpiluar indeksin, autorët (Universiteti i Oksfordit) kanë marrë në konsideratë 9 masa shtrënguese me një vlerësim nga 0 në 100 (mbyllja e shkollave, mbyllja e kufijve, mbyllja e vendeve të punës, etj).

Ajo që vihet re është se :

Shqipëria ka marrë shumë shpejt masa shtrënguese të avancuara. Brenda 20 ditësh Shqipëria ka kaluar nivelin 80 të treguesit.

Greqia e ka kaluar Shqipërinë në masa shtërnguese, por në mënyrë më graduale.

Serbia ka arritur në nivelin 100 të masave shtrënguese, por pas 58 ditësh.

Suedia, edhe pse është krijuar përshtypja e përgjithshme se ka qënë shumë e lehtësuar, në 40 ditë e para ka qënë më e shtrënguar se Gjermania dhe Serbia.

Në 30 ditët e para nga masa e parë edhe Italia ka qënë relativisht liberale në masat shtrënguese (Italia nuk ka zbatuar një skenar uniform në të gjithë vendin).

Aktualisht niveli i masave shtrënguese në vendet përkatëse rezulton:

Shqipëqri 88 (10 maj)
Greqi 74 (17 maj)
Itali 69 (15 maj)
Serbi 57 (18 maj)
Suedi 47 (18 maj)
Gjermani 71 (18 maj)

Të dhënat për Shqipërinë janë të para dy javëve dhe nuk tregojnë realitetin e sotëm. /abcnews