Pasi kryeministri Edi Rama dje paralajmëroi ashpër ministrat se mund t’i çojë në SPAK, ka ardhur edhe reagimi i kreut të PD, Lulzim Basha. Kreu demokrat u shpreh se Rama në këto 8 vite pushtet vetëm e ka zhytur vendin në korrupsion. Sipas tij është e qartë për të gjithë shqiptarët se peshku qelbet nga koka duke nënkuptuar se problemi vjen nga lart.
“Ka 8 vite në pushtet dhe sot më në fund pranoi se qeveria e tij e ka zhytur vendin në korrupsion. Ajo që ai nuk thotë dhe është e qartë për të gjithë shqiptarët është se peshku qelbet nga koka”, -shkruajti Basha.
Ndërkohë më herët kreu i Partisë Demokratike ka reaguar edhe për përjashtimin e kryebashkiakut të Lushnjes, Fatos Tushe nga Partia Socialiste. Sipas Bashës, kryeministri e bëri ish-kryebashkiakun e Lushnjes “kokë turku” ndërkohë që ai vetë është më i korruptuari.
“Mund të lash duart me një kryebashkiak të korruptuar apo të bësh koka turku bedelët e tu në atë sallë, por shqiptarët e dinë mirë se peshku qelbet nga koka”, – shkruajti Basha.
Më tej një reagim ka ardhur edhe nga ish-deputetja e Partisë Demokratike, Dhurata Çupi, e cila me anë të një deklarate për mediat nga selia blu u shpreh se mbledhja e Ramës me kryebashkiakët ishte një teatër absurd. Ajo u shpreh se njerëzit e ndershëm në sallën e mbledhjes shin shumë të paktë. Sipas PD, Rama është një shkelës i ligjeve që nuk vendos dot kritere ndershmërie.
“Pas shfaqjes tallëse me policinë, Rama dhuroi shfaqjen e radhës me drejtuesit e komanduar të pushtetit vendor. “Bëni si them unë, por mos bëni si bëj unë”, u tha Rama të emëruarve të tij në bashkitë e vendit. Natyrisht qytetarët shqiptarë e dinë se njerëzit e ndershëm të mbledhur në atë sallë numërohen në gishtat e një dore, megjithatë të dëgjosh Ramën që bën moral për tenderat dhe korrupsionin, nuk është gjë tjetër veçse një nivel i ri i teatrit të absurdit. Sepse shkelësi i ligjit nuk mund të vendosë drejtësi aq më pak kritere ndershmërie në zbatimin e ligjeve mbi prokurimet publike”, – tha ajo.
Diskutime rreth kësaj post