Kryesocialisti Rama, ishte këtë të shtunë në Jug të vendit, në një takim të zhvilluar në bypasin e Gjirokastrës, ai ka prezantuar edhe kandidatët për bashkitë e Libohovës dhe Dropullit.
Në fjalën e tij, Rama tha se në këto zgjedhje nuk duhet parë çështja politike, por se kush palë ofron administratorët më të mirë për të qeverisur qytetet.
“Këtu bëhet fjalë për të marrë në punë dikë, këtu nuk bëhet fjalë për të ndarë sinorët politike, këtu nuk bëhet fjalë për të ndarë me tifozllëk sa të fortë jemi ne e sa të fortë janë ata dhe anasjelltas; këtu bëhet fjalë për të angazhuar njerëzit e duhur dhe për t’i gjetur punës njerëzit dhe jo njerëzve punë. Ky është dallimi më i madh në këtë fushatë!”, tha Rama.
Duke kërkuar votën për të gjithë kandidatët e Partisë Socialiste, Rama tha se ka një dallim të madh të bashkive kur menaxhohen nga opozita dhe kur menaxhohen nga socialistët.
“Në Gjirokastër ne kemi një shembull, kemi Libohovën. Ne nuk kemi pasur mundësi ta drejtojmë Libohovën për shumë vite. Ka qenë, siç quhet ndryshe, bastion i djathtë. Bastion i djathtë do të thotë bastion i papastërtisë, bastion i dembelizmit, bastion i një klani që sundon qytetin apo fshatin, bastion ku paratë nuk dihet se ku shkojnë, bastion ku nuk mbillet asnjë pemë, bastion ku plehrat rrinë dy e tre ditë mbi kazan, siç rrinë në Shkodër sot e gjithë ditën për turpin e dheut”, tha Rama.
Diskutime rreth kësaj post