Teksa zgjedhjet parlamentare të 25 prillit po afrojnë, Partia Socialiste ka nisur të bëjë llogaritjet për të çuar sa më shumë vota në hambarin e saj, me qëllim sigurimin e sa më shumë mandate deputetësh, në mënyrë që të qeverisë e vetme.
PS si parti është ndoshta nga të vetmet që ka ndezur prej muajsh motorët e fushatës elektorale, ndërkohë që krerët më të lartë të saj, duke filluar nga kryeministri Edi Rama, jo vetëm që kërkojnë një mandat të tretë qeverisës, por i kanë vënë edhe synim vetes që të marrin mbi 71 deputetë. Mirëpo, ndryshe nga herët e tjera këto zgjedhje pritet që të jenë tepër të forta, për shkak se në skenë kanë dalë edhe disa parti të reja, të cilat synojnë të marrin votat e qytetarëve të zhgënjyer, strategji kjo që do t’i pamundësojë socialistëve që të qeverisin.
Mirëpo gazeta ka mësuar se Partia Socialiste ka një plan B, të cilët pritet të vendosë në zbatim pas zgjedhjeve. Sipas informacioneve nëse PS nuk do të arrijë që të rrëmbejë në 25 prill 71 mandate deputetësh, ajo pritet që të nisë negociatat me partitë e reja për t’i ftuar në koalicion dhe qeverisur bashkë me to. Kjo do të thotë se pas 25 prillit, pritet që të hapet “merkatoja” e deputetëve, ku socialistët pritet të negociojnë me partitë e reja si Bindja Demokratike e Astrit Patozit, Lëvizja për Ndryshim e Jozefina Topallit, Partia Social Demokrate e Tom Doshit apo Lëvizja Demokratike Shqiptare e Myslim Murrizit, për të mundësuar formimin e qeverisë.
PS drejt aleancave me partitë e reja
Por një sinjal të tillë e ka pohuar ditën e djeshme edhe sekretari Organizativ dhe i Koordinimit Elektoral në Partinë Socialiste, Arben Pëllumbi. Ku i fundit gjatë një prononcimi për mediat ditën e djeshme nuk e përjashtoi mundësinë e koalicioneve paszgjedhore, nëse PS nuk do të marrë e vetme 71 mandatet në zgjedhjet e 25 prillit.
“Sigurisht kjo është politikë dhe në fund fare të duhen shifrat për të bërë qeverisjen. Pas 25 prillit ne do të shikojmë cilat do jenë rezultatet, por sot për sot flasim se PS do t’i fitojë 71 mandate. Kjo është shumë shpejt për të folur madje është një temë që nuk ka vend për ta diskutuar sot, por do të preferojmë të kemi aleanca me ato parti që mbështesin programin e PS dhe programin dhe filozofinë e saj për qeverisjen e vendit dhe integrimin në BE. Do të shikojmë se cilët do jenë numrat. Besoj se do i kemi mandatet tona, por në rast se nuk i kemi do shikojmë mundësitë e bashkëpunimit, por do preferonim forca më të vogla politike”, – deklaroi ai.
Më tej deputeti socialist, Arben Pëllumbi gjatë fjalës së tij zbuloi se paritë që do të pranojnë gabimet e PS, do të jenë ato që forca politike ku ai bën pjesë do të bashkëpunojë në koalicion, sikundër janë ato të qendrës së djathtë apo të majtë.
“Kur thashë se bashkëbisedojmë sepse fillimi i bisedimeve do jetë me forcat politike që janë të rreshtuara qartësisht majtas dhe në aleancë me ne në të gjitha situatat zgjedhore që kemi kaluar, por nuk përjashtohet mundësia e bashkëpunimit me forcat politike, të cilat mund të kenë dhe programe jo të majta ose të qendrës. Ne nuk bëjmë bisedime me forcat politike që tashmë prej vitesh janë të rreshtuara me PS, me programin dhe vizionin e saj për zhvillimin e vendit”, – u shpreh ai.
Ndërkohë, zoti Pëllumbi ironizoi edhe LSI, kur tha se PS në zgjedhjet e 25 prillit ka kundërshtare vetëm Partinë Demokratike.
“Është e rëndësishme që vendi pas 25 prillit të ketë një qeverisje të qëndrueshme dhe një opozitë konstruktive. PD është forca politike opozitare që historikisht ka qenë përballë nesh, kështu besoj do jetë përballë nesh edhe pas 25 prillit”, – nënvizoi Pëllumbi.
Diskutime rreth kësaj post