Komisioneri Shtetëror i Zgjedhjeve, Ilirjan Celibashi ka dhënë një deklaratë për mediat, ku bëri një përmbledhje të ditës së sotme të votimit.
Celibashi u shpreh se procesi ka shkuar në përputhje me të gjitha standardet.
“Procesi ka shkuar, me ndonjë përjashtim sporadik, në përputhje me të gjitha rregullat dhe standardet. Problematikat e konstatuara kryesisht në mëngjes në momentin e hapjes së votimit, janë adresuar menjëherë”, u shpreh Celibashi.
Sa i përket numrit të zgjedhësve në votime, Celibashi tha se shkoi në 41.37%.
“Sikurse e shikoni është 41.37% ora 18:00, por është në çdo 1 orë, nuk e di nëse e ka marrë të dhënën e fundit, është midis orës 18:00 dhe 19:00. Do ketë një update që nuk besoj se do ketë ndonjë ndryshim të madh në këtë raport përqindjeje”, u shpreh ai.
Celibashi u shpreh se edhe procesi i identifikimit elektronik ka shkuar shumë mirë. Ai u bëri thirrje partive politike për qetësi, tashmë që procesi kalon në fazën e numërimit të votave.
“Ajo çfarë të gjithë do të duhet të kemi në vëmendje është qetësia që duhet tu krijojnë partitë dhe udhëheqësit politike numëruesve dhe anëtarëve të komisionit. Është e këshillueshme që deklarimet për rezultatet që vijnë pas vlerësimit të fletëve të votimit paraprakisht nga përfaqësuesit politike janë pa asnjë vlerë dhe janë pa kontribute pozitive”, tha Celibashi.
Diskutime rreth kësaj post