“PD po përdoret si mburojë ndaj zhvillimeve që do të ndodhin”, demokrati del me paralajmërimin e fortë: Ky është gabim i rëndë

Ish-anëtari i Këshillit Kombëtar të PD-së, Edvin Kulluri e shikon procesin zgjedhor që u zhvillua dje si një tentativë për t’u mbrojtur nga disa zhvillime të rëndësishme, që ai paralajmëron se do të ndodhin së shpejti.

I ftuar në studion e “7 pa 5” Kulluri tha se zgjedhjet brenda PD-së ishin më keq sesa zgjedhjet e përgjithshme parlamentare.

“Basha zgjedhjet në parti i ka bërë shumë më keq se Rama zgjedhjet e përgjithshme. Po marrim një pretendim të opozitës, që është administrata e angazhuar në fushatë. E njëjta gjë në PD, u bë presion i hapur në qendra votimi për të votuar Lulzim Bashën. Kur ti bën një proces zgjedhor më keq se maxhoranca, i vetmi qëllim kryesor është të shkatërrosh plotësisht imazhin e Partisë Demokratike. Opozita ka dënuar veten të humbë zgjedhjet e tjera. Do të shkojmë keq e më keq. Nëse Basha mendon se do të përdorë partinë për t’u mbrojtur, ky është gabim i rëndë. Ata që mendojnë se kanë kusure për të paguar, për çështje korrupsioni e çështje të tjera, mundohen të mbajnë peng PD-në si mburojë ndaj zhvillimeve që do të ndodhin. Procesin zgjedhor dje nuk e ka kryer Berisha, e ka kryer Lulzim Basha.”, – u shpreh Kulluri.