Pasi mblodhi Shtabin e Emergjencave, Veliaj jep lajmin e mirë: Gjithçka do t’i kthehet normalitetit, shkollat hapen nesër

Sapo ka përfunduar mbledhja e Shtabit të Emergjencave në raportimin mbi verifikimet e situatës në terren pas tërmetit së ditës së djeshëme.

Veliaj është shprehur se ndjehet i lumtur me lajmin e hapjes së shkollave ditën e nesërme ndërsa theksoi se fëmijët do ti rikthehen normalitetit në shkolla si dhe nuk ka nguruar të sulmojë lajmin që alarmoi qytetarët mbrëmjen e kaluar mbi një tërmet të fuqishëm që pritet të ndodhte.

“Menaxhim i jashtëzakonshëm i situatës pas rënies së tërmetit nga strukturat shtetërore dhe vendore. Në Ndroq dhe Kashar, familjet po i rikthehen normalitetit. Lajmi për paralajmërimin e tërmeteve të fuqishme para mesnatës së mbrëmshme ishte kriminal, i lumtur që hapen shkollat nesër. Vetëm shkolla në Allgjatë do të mbyllet përkohësisht. Fokusoheni tek ndihmat me ushqime dhe batanije për qytetarët e dëmtuar. 456 banesa janë përllogaritur si të dëmtuara pjesërisht. Ndërkohë që kërkoj nga autoritetet përgjegjëse të kthehen në terren dhe të kontaktohen të gjithë njerëzit mbi situatën”, tha Veliaj.

Ndërkohë drejtoresha e Çerdheve në Tiranë, Zhaneta Beqiri, bëri me dije se nuk ka pasur dëme serioze në institucionet që ajo drejton ndërsa theksoi se dëmet janë riparuar.

“Nuk ka pasur dëme serioze në shkolla dhe çerdhe. Aty ku janë konstatuar janë riparuar dhe janë gati për nesër. Ndërsa do të ketë takime sensibilizuese me fëmijët e shkollave 9-vjeçare për të kaluar traumat post tërmet”, tha Beqiri.

Ndërkohë Arbër Mazniku tha se Pallatet Sovjetike në Kombinat nuk kanë problem strukturore përveç çarjes së mureve.