Kreu i Partisë Demokartike, Lulzim Basha, ditën e djeshme mblodhi krerët e degëve në një takim ku u diskutua për strategjitë që do përdoren. Bëhet me dije se sot në mesditë, në Partinë Demokratike, do të mblidhet koalicioni opozitar, për herë të parë pas gati dy muajsh.
Kreu i PD dhe krerët e partive aleate, pritet të diskutojnë për situatën aktuale, për mënyrën se si ka menaxhuar qeveria pandeminë, dhe më kryesorja, se çfarë do të ndodhë me sezonin politik në vend.
Shtyrja e gjendjen së fatkeqësisë natyrore deri me 23 qershor, e ka bërë të pamundur për të patur një aksion politik në terren. Edhe pse, opozita dhe lideri i saj, janë shprehur se mbështesin çdo kërkesë apo protestë të qytetarëve.
Sinjalet e para të disa lëvizjeve sporadike kanë nisur, me një miniprotestë në Fier gjatë vizitës së Ramës atje, apo një tjetër e banorëve të njësisë 5.
Opozita ka kritikuar qeverinë për mungesën e një plani dhe strategjie për menaxhimin e situatës shëndetësore, apo edhe për atë të hapjes dhe rikthimit të jetës normale.
Kritikat më të forta kanë qënë për paketën ekonomike, që sipas PD është e pamjaftueshme, jotransparente, dhe po ashtu, e ngadaltë, pasi ende nuk ka mbërritur tek bizneset dhe njerëzit në nevojë.
Nga ana tjetër, opozita ka bërë denoncime të forta për abuzime me tenderat, me anë të procedurave sekrete. Dhe siç është bërë e ditur, SPAK po avancon me hetimin e rasteve.
Po dje, nënkryetari i PD, Edi Paloka, në një intervistë për mediat u shpreh se opozita nuk ka hequr dorë nga kërkesa për zgjedhje të parakohëshme. Mirëpo, duke ditur se deri në fund të Qershorit gjendja do të vazhdojë të jetë e tillë, pastaj vijnë muaj e verës dhe pushimeve, me gjasë, aksioni opozitar do të duhet të presë Shtatorin.
Sot në mesditë, pritet të diskutohet për këto çështje, dhe koalicioni opozitar të dalë me një qendrim.
Diskutime rreth kësaj post