Një lajm i mirë për shoferët në Shqipëri: Për ata që e kanë bërë kontrollin teknik të mjeteve në 2020

Drejtor i DPSHTRR Bledi Gonxhe, tha se kush e ka bërë kolaudimin e makinës brenda 2020, tashmë do ta ribëjë atë në vitin 2022.

“Ne menduam që ta bëjmë kohën e vlefshmërisë së certifikatës dy vjet nga një dhe po ashtu kemi diskutuar këto ditë që të jetë e vlefshme për të gjitha kolaudimet e bëra në vitin 2020. Kjo do të thotë që çdo përdorues mjeti që ka bërë kolaudimin korrekt brenda datës në vitin 2020 pa penalitete, në kuptimin që nuk e ka lënë pa bërë kolaudimin në vitin 2020, ka paguar taksat e automjetit dhe ka kryer kolaudimin pavarësisht se e ka bërë në janar, shkurt, mars apo dhjetor do të vijë në vitin 2022.

Kjo është e rëndësishme dhe besoj se është një e mirë për të gjithë ata që kanë një automjet. Në radhë të parë kjo iu jep dorë të gjithë atyre që kanë më pak kohë dhe mundësi për të qëndruar në radhë. Megjithatë ka dhe një shqetësim që lidhet me një pjesë të opinionit e cila thotë që mos abuzohet me këto dy vjet dhe makinat mos janë të dëmtuara etj.

Për këtë arsye ne do të shtojmë kontrollin rrugor. Nuk duhet të trembet njeri, ky kontroll do të jetë i informatizuar. Do të jetë Task Forca e Transportit Rrugor për mjetet mbi 3.5 ton që është me mjete të specializuara dhe Policia Rrugore, të cilat do të jenë më të vëmendshme në vitin 2021 për shkak të këtij lirimi që ne po bëjmë”, u shpreh Gonxhe për Vizion Plus.