Deputeti i PS-së, Alket Hyseni u shpreh mbrëmjen e djeshme në emisionin ‘Opinion’ se objekti i Komisionit Hetimor parlamentar për shkarkimin e Ilir Metës nuk ishte verifikimi nëse duhej ndjekur penalisht apo jo, megjithëse përsërit se në raportin e hartuar prej 98 faqesh ka edhe elementë penalë.
“Ne nuk mund të themi ka apo s’ka krime, por nuk ishte objekt i hetimit i Komisionit Hetimor krimi. Aty ka dhe elementë që mund t’i shqyrtojnë organet e hetimit siç janë thirrjet për dhunë dhe nxitja të urrejtjes”, – tha ai.
Hyseni shprehet se objekti i Komisionit ishte shqyrtimi nëse Meta kishte shkelur Kushtetutën dhe sipas tij, edhe shqiptarët e kanë të qartë se kjo ka ndodhur.
“Komisioni Hetimor ka paraqitur një raport të shoqëruar me prova konkrete të cilat janë shkresore, postime pamje filmime etj. Komunikime me institucione të cilat faktojnë atë që opinioni publik e ka shumë të qartë që presidenti ka shkelur Kushtetutën”, – vijoi ai.
Sipas deputetit që udhëhoqi punën e këtij Komisioni, i gjithë qëllimi i Metës ishte të dëmtonte Partinë Socialiste në zgjedhje.
“Ne kemi hetuar dhe qëllimi i Presidenti ka qenë qëllim politike për të dëmtuar mazhorancën, kjo është faktuar nga Komisioni përmes konferenca të tij për shtyp dhe postimeve”, – tha ai.
Në lidhje me Gjykatën Kushtetuese, u shpreh se brenda 3 muajve ajo duhet ta shqyrtojë kërkesën e dorëzuar nga Kuvendi.
Diskutime rreth kësaj post