Ilir Meta i di mirë punët e veta, siç thoshte edhe ajo kënga e famshme e disa viteve më parë. Dhe duket se kështu ka rezultuar edhe me përplasjen e fundit me maxhorancën. Ka mjaftuar një hapësirë ligjore që Presidenti Meta gjeti tek procedura e emërimit të Sandër Lleshajt si ministër të Brendshëm për ta detyruar Ramën që t’i ofrojë diçka si shkëmbim për të marrë dekretin e ministrit të tij.
Ngërçi ishte qënia e Lleshajt si ushtarak aktiv ndërkohë që ligji nuk lejonte që ai të ishte njëkohësisht edhe ministër. Ky argument bëri që Meta të vonojë për disa javë dekretin e Lleshajt.
Por, Presidenti ka nisur tashmë procedurat e dekretimit, të cilat “A-në” e kanë nga çdekretimi i tij si ushtarak aktiv në Forcat e Armatosura të Republikës së Shqipërisë. Pas këtij dekreti, gjasat janë që Presidenti të lejojë edhe Lleshajn të jetë ministër i Brendshëm duke përmbyllur kështu këtë “krisje” siç e quajti Rama mes dy institucioneve.
Por, eksperienca ka treguar që Meta nuk bindet lehtë pa i ofruar diçka në situata të tilla dhe duket se ai e ka marrë copën e tij.
Në pamundësi për të vendosur një njëri të tijin në krye të SHISH edhe pse e mbajti në sirtar për më shumë se një vit Bendon, Meta duket se do të shtjerë në dorë prokurorinë hije të shtetit, siç është Kontrolli i Lartë i Shtetit, me kandidaturën e Vitore Tushajt për në krye të saj.
Pritet që ai të firmosë Leshajn si ministër, ndërsa Ramës nuk i mbetet gjë tjetër vetëm se të fusë në vathë deputetët e tij për të miratuar Tushajn në krye të KLSH-së. /albeu
Diskutime rreth kësaj post