Kandidati për president të Barcelonës, Agusti Benedito ka thënë se Lionel Messi me shumë gjasë do të largohet në këtë verë.
Ylli argjentinas në verën e vitit të kaluar dorëzoi letrën për largim, mirëpo në fund u bind nga familja e tij që të qëndronte në Camp Nou.
Por, duke parë situatën aktuale që gjendet klubi, 33-vjeçari do të tentojë të largohet si lojtar i lirë në fund të edicionit.
Benedito ka thënë se ata do ta kenë të vështirë të mbajnë gjashtë herë fituesin e Topit të Artë duke shikuar nga situata aktuale ku është Barcelona.
“Mbajtja e Messit do të ishte lajmi më i mirë për klubin, por unë nuk jam shumë optimist”, ka thënë sipërmarrësi spanjoll për ESPN.
“Duke pasur parasysh situatën e klubit, unë mendoj se është me të vërtetë e rëndësishme që ai të qëndrojë te Barca, me mirëkuptimin që ai e kupton dy vitet e ardhshme që kemi përpara [mund të jetë e vështirë]”.
“Ai ka qenë këtu për 20 vjet; ai është një tifoz i Barcelonës dhe mendoj se ai është i ndjeshëm ndaj situatës. Ai na ka dhënë aq shumë në të njëjtën mënyrë sa Barcelona i ka dhënë shumë dhe është koha që të gjithë të hapim mëngët”.
“Do të doja që ai të thoshte në intervistën e tij javën e kaluar se dëshira e tij është të qëndrojë në klub, por ai nuk e bëri dhe tani duhet të presim dhe të shohim. E vërteta është që unë jam pesimist”.
“Mos harroni se në gusht ai tha se donte të largohej pas 20 vjetësh dhe tani ai ende nuk është qartësuar se çfarë dëshiron të bëjë. Rezultati më i mundshëm që shoh është se ai na lë në verë”, ka thënë Benedito.
Messi është duke u kërkuar aktualisht nga Paris Saint-Germaini dhe Manchester City që janë të gatshëm t’i plotësojnë kërkesat e tij.
Diskutime rreth kësaj post