LSI ndez ‘motorët’ e fushatës, ‘shpërfillet’ Kryemadhi dhe përdorin foton e Presidentit Meta

Lëvizja Socialiste për Integrim ka ndezur motorët e fushatës elektorale për zgjedhjet e 2021-shit, në 16 vjetorin e krijimit të saj.

Në një postim në rrjete sociale LSI Durrës ka përdorur foton e presidentit Ilir Meta, për të ndarë një mesazh ku thekson se nuk janë zgjedhje për 4 vitet e ardhshme por për të ardhmen e vendit.

“Edhe 1000 vite të tjera LSI. Kjo betejë nuk është thjesht politike. Është mision. Nuk janë zgjedhje për 4 vitet e ardhshme por për të ardhmen e vendit. Për punësimin e të rinjve, për ndalimin e eksodit dhe shpopullimit, për të ndalur largimin e trurit të vendit, që rinia jonë e mrekullueshme ta ndërtojë këtu të ardhmen e vet.

Që sovraniteti t’i përkasë vetëm popullit, popullit dhe vetëm popullit. Dhe të kemi një qeverisje të popullit, nga populli dhe për popullin”, – thuhet në postim.

Meta ka qenë kryetari i LSI deri përpara se të zgjidhej president, por si duket ai vijon të jetë një figurë kryesore e kësaj partie që ndikon te elektorati.