Lefter Maliqi zbulon kush e detyroi PS të tërhiqet nga ndryshimet Kushtetuese dhe ka një paralajmërim

Deputeti Lefter Maliqi ka reaguar me tone të ashpra pas shtyrës së Kuvendit ditën e sotme, ku ishte premtuar se do të kalonin ndryshimet Kushtetuese me apo pa dakordësinë e opozitës.

Maliqi paralajmëron se Rilindja do të shkrihet si akullore. Sipas tij, ishte presioni i ndërkombëtarëve që i bëri të tërhiqen socialistët nga ndryshimet në Kodin Zgjedhore.

Jo vetëm kaq, por Maliqi shkruan se PS i ka hyrë frika në palcë nga koalicioni PD-LSI.

Postimi i plotë:

“Rilindja do shkrihet si akullore, kaushi do i ngelet Ramziut. Pas presionit të fortë të partnerëve tanë ndërkombëtarë, Ramziu u tërhoq nga kalimi i ndryshimeve kushtetuese, që kishte kërcënuar se do ti kalonte në seancën e sotme plenare, edhe pa dakordësinë e Opozitës së Bashkuar dhe asaj parlamentare.

Por, dje, ‘transportuesi’ Damian Gjiknuri, paralajmëroi se konsensusi është i pamundur kur vjen puna te koalicionet parazgjedhore.

Pse qenka i pamundur o Gjiknur, mos jeni gjë zotër të gjithçkaje e meqë keni votat, bëni çfarë të doni?!

Megjithëse të kuptoj, sepse çdo gjë e ndershme dhe e drejtë, për ju është e pamundur.

Ju ka hyrë frika në palcë nga fitorja spektakolare e koalicionit të madh PD-LSI.

Mirë nga koalicioni paskan frikë, po listat e hapura pse nuk i do Ramziu, pse luan në mënyrë mafioze edhe aty?

I ka dëgjuar Ramziu mesazhet e përditshme të ambasadorëve në Tiranë, zyrtarëve në Bruksel etj, kur japin ultimatumin që mos të preket marrëveshja e 5 Qershorit?

Dje, e përsëriti edhe ambasadori britanik në Tiranë, në të njëjtën linjë me kolegët Kim, Soreca etj…

Ramzi, nuk ke zgjidhje tjetër, përveçse të heqësh dorë nga manovrat e ndyra që të karakterizojnë, ti japësh fund mbledhjeve të dështuara të Këshillit Politik, dhe ti thuash ‘transportuesit’ që drafti i Opozitës së Bashkuar është e vetmja alternativë e ndershme dhe në shërbim të votuesit shqiptar.

Lexoje mirë letrën që të mbërriti sot nga Opozita e Bashkuar, është në të njëjtën linjë me Brukselin, që nëse shkelet marrëveshja e 5 Qershorit, rrezikohen negociatat o Ramzi.

Megjithëse ty kjo fjalë të ka ardhur në majë të hundës, se i ke hapur në Shqipëri, sa herë ti kanë mbyllur në Bruksel.

Prano ekspertizën e OSBE/ODIHR Ramzi, sepse sido që të shkojë, je i marrë fund.

O i Pashpresë, që ke filluar edhe presionin e kapjes së votave, me metoda mafioze, duke nisur edhe me zhvendosjen e listave të zgjedhësve nga zonat e tyre; po e shtrydh ushtarin tënd Lleshaj, deri në pikën e fundit.

Çfarëdo manovre të bësh ti o Ramzi dhe ushtarët e tu, për interesa të pushtetit tënd personal, që ka 7 vite e gjysmë i lidhur me krimin e korrupsionin, humbjen e ke të garantuar.

Dije mirë se Rilindja jote do shkrihet si akullore, sigurisht që kaushi do të të mbetet ty.

P.S Dhe mjaft postove tabela me shifra e statistika të vizatuara nga ushtarët e tu, për të treguar se sa mirë qeveris, se nuk ka më shqiptar që e beson këtë, i je neveritur deri në palcë.” – shkruan Maliqi.