Deputetja Rudina Hajdari foli sot me tona të ashpra në Kuvend. Hajdari e cilësoi turp për politikën shqiptare që hesht për naftëtarët e Ballshit që protestojnë për pagat e tyre.
Në fjalën e saj, gjithashtu Hajdari përmendi se një grup të pangopurish që e kanë lënë vendin me 900 milion euro borxh jetojnë si sheik, ndërsa punëtorët që kërkojnë pagat procedohen.
Hajdari ka vënë në dukje edhe heshtjen e opozitës jashtë parlamentit, e cila si gjithmonë hesht përpara fenomeneve të tilla, ku një grup punëtorësh kërkojnë të marrin jo më shumë, por vetëm pagën për djersën e derdhur në punë.
“Njerëz të palodhur që nuk paguhen, nga ana tjetër kemi disa njerëz që janë të pangopur, kanë marrë këtë pasuri e kanë shfrytëzuar dhe e kanë futur vendin në gropë. Dua të përmend naftëtarët e Ballshit që janë njerëz me dinjitet janë kthyer pa dinjitet se nuk ka kush t’i mbrojë, deputetët heshtin, qeveria hesht, por edhe një opozitë që është jashtë parlamentit edhe ajo hesht dhe kjo është skandaloze. Më përpara dhe pse ishte një biznes i korruptuar prapë i sillte fitim shtetit. Që kur arma u privatizua, që në kohën e Berishës, e ka çuar vendin në gropë.
Ata me të drejtë kërkojnë rrogat e tyre, e kanë lënë me 900 milion euro dollarë borxh këtë vend. A ka ndonjë procedim për këta persona që nuk paguajnë punëtorët. Me kohë këta naftëtarë dalin në rrugë për të protestuar. Një grup të pangopurish që jetojnë si sheik, ndërsa ata që kërkojnë pagat procedohen. Sot ne heshtim përpara atyre që kërkojnë pagat. Ky lloj sistemi duhet të shkallmohet”, – deklaroi Hajdari.
Diskutime rreth kësaj post