Kreu i Bindjes Demokratike ka komentuar përplasjet opozitë-maxhorancë për ndryshimet kushtetuese. Sipas Patozi palët po bëjnë kot sikur po zihen.
“Mos bëni sikur po ziheni se kush e respekton më shumë OSBE/ODIHR-in, se maksimumin e dashurisë për të e keni shprehur më 5 qershor, kur i hodhët në kosh kryerekomandimin mëse 10 vjeçar të depolitizimit të administratës zgjedhore”, shkruan Patozi.
Më tej politikani shton se: ‘çdo zvarritje në këtë drejtim mund të shërbejë vetëm për të shtyrë ditët e aletëve të Lulzim Bashës brenda koalicionit, por asgjë më shumë se sa kaq’.
Postimi i Patozit:
“NJË PROPOZIM KONKRET PËR TË SHPËTUAR ZGJEDHJET E 25 PRILLIT
Mos bëni sikur po ziheni se kush e respekton më shumë OSBE/ODIHR-in, se maksimumin e dashurisë për të e keni shprehur më 5 qershor, kur i hodhët në kosh kryerekomandimin mëse 10 vjeçar të depolitizimit të administratës zgjedhore. Dhe nënshkruat atë marrëveshje të turpshme për ta lënë gjithçka siç ishte, mjafton që kryetarokracia të mos prekej.
Një palë duke bërtitur fitore se gjoja e shpëtuan Shqipërinë nga manipulimi, që i bie se e rekomandonte me forcë OSBE/ODIHR-i, kurse pala tjetër duke bërë si e mërzitur, por ndërkohë duke mbushur xhepin me gjysmën e komisionerëve dhe të numuruesve në gjithë Shqipërinë.
Nuk ua quan njeri këtë debatin e sajuar për ruajtjen e koalicioneve si më parë, ndërkohë që ka ndryshuar kushtetuta, për të cilën janë të qartë të gjithë, si ata që po e kërkojnë, edhe ata që po shtiren sikur nuk kanë ndërmend të lëshojnë pe.
Çdo zvarritje në këtë drejtim mund të shërbejë vetëm për të shtyrë ditët e aletëve të Lulzim Bashës brenda koalicionit, por asgjë më shumë se sa kaq. Nuk do të jetë e largët dita që secili prej tyre apo të gjithë bashkë do të ndajnë mendjen nëse do të garojnë në një listë të përbashkët, apo secili më vete. Ky ëhstë i vetmi vendim që duhet të marrin dhe duke e vonuar, nuk është se fitojnë ndonjë gjë. Por tek e fundit, ky është halli i tyre, të cilit duhet t’i dalin zot vetë.
Problemi i Shqipërisë është që zgjedhjet e 25 prillit të paktën të jenë normale, se të lira dhe të ndershme, mbetet ende një fjalë e madhe në këtë vend. Dhe armikun kryesor, përveç qeverisë, që është në çdo rast aty për të vjedhur dhe manipuluar, ato kanë pikërisht komisionet e politizuara të votimit dhe të numurimit. Dhe këtë e dinë më mirë se gjithë të tjerët dashnorët e përvëluar të OSBE/ODIHR-it këto ditët e fundit, sepse për këtë punë e kanë bërë.
Por meqë jemi ende në kohë për të shkruar rregullat e lojës në Kodin Zgjedhor, ka një mënyrë për ta minimizuar rolin e çakejve politikë”, ka shkruar Patozi.
Diskutime rreth kësaj post