Aksion kundër kontrabandës së barnave, raportohet për gjashtë të arrestuar
Policia po zhvillon një operacion në disa lokacione në Shkup, përfshirë Çairin, si dhe në Tetovë e Gjevgjeli, në kuadër të një hetimi për kontrabandë dhe tregti të paligjshme me barna e suplemente ushqimore.
Sipas informacioneve jozyrtare, deri tani janë arrestuar gjashtë persona. Ndërkohë, po kërkohen edhe persona të tjerë të dyshuar për përfshirje në rast, mes të cilëve raportohet se ka punonjës të Drejtorisë së Doganave.
Kontrollet dhe bastisjet po kryhen në më shumë se dhjetë lokacione. Gjatë ndërhyrjeve në subjekte juridike në Shkup dhe Tetovë, është zbuluar një magazinë me lloje të ndryshme barnash. Gjithashtu, është sekuestruar një makinë për ekstraktimin e vajit.
Sipas Ministrisë së Punëve të Brendshme, operacionin e zhvillon Departamenti për Luftimin e Krimit të Organizuar pranë Byrosë për Siguri Publike. Hetimi përfshin dyshime për kontrabandë, shkelje të të drejtave të pronësisë industriale, dhënie dhe marrje ryshfeti, si dhe pastrim parash.
Aksioni dhe mbledhja e provave po vazhdojnë. Pas përfundimit të kontrolleve dhe dokumentimit të rastit, priten hollësi zyrtare për rezultatet e operacionit dhe numrin e personave të përfshirë.
Personat e dyshuar konsiderohen të pafajshëm deri në vërtetimin e fajësisë me vendim gjyqësor të formës së prerë.
Diskutime rreth kësaj post