Inspektorati Kombëtar i Mbrojtjes së Territorit ka prishur sot brenda territorit të Univeristetit Bujqësor të Tiranës 11 objekte.
Operacioni i IKMT, i drejtuar direkt nga kryeinspektorja Dallëndyshe Bici, është ndërrmarrë në kuadrin e rikthimit të këtij institucioni publik në shërbim të studentëve dhe pedagogëve, premtim ky i parapakkohshëm i kryeministrit Edi Rama. Operacioni është inspektuar edhe nga Ministri i Brendshëm Saimir Tahiri.
Përgjatë aksionit të ditës së sotme, që ka nisur prej orës 6.00 me prishjen e tre objekteve që pengonin kalimin e mjeteve, janë prishur gjithsej 11 objekte dy dhe tre katëshe me funksione të ndryshme shërbimi. Nuk janë shënuar incidente mes banorëve dhe punonjësve të IKMT.
Në një deklaratë të shkurtër publike, kryeinspektorja Dallëndyshe Bici, ka vënë në dukje një ngërç nga ana e vendimeve gjyqësore. “Ne kemi pasur shumë pak probleme me qytetarët. Më shumë problem kemi hasur me vendimet gjyqësorit. Nuk duam që gjykatat të mbështesin vendimet dhe veprimet tona, thjesht të zbatohet ligji”, është shrehur Bici.
Operacioni i IKMT në Universitetin Bujqësor të Tiranës dhe rreth tij do të vazhdojë sërish në një etapë të dytë.
Diskutime rreth kësaj post