Djali i Presidentit të zgjedhur të SHBA-ve Joe Biden, Hunter, ka thënë se është nën hetim për taksat. Hetimi po kryhet nga prokurorët federalë në Delaware.
Në një deklaratë të nxjerrë nga zyra e tranzicionit e presidentit të zgjedhur, Hunter Biden thoshte se ishte informuar për hetimet të martën, pa dhënë hollësi të tjera.
“E marr shumë seriozisht këtë çështje, por kam besim se një rishikim profesional dhe objektiv i këtyre dokumenteve do të tregojë se i kam trajtuar punët e mia në mënyrë të ligjshme dhe të rregullt, përfshirë përmes konsultimeve me profesionistë për çështje fiskale,” – thoshte ai në deklaratë.
Hunter Biden ka qenë prej kohësh objekt sulmesh nga Presidenti Trump dhe aleatët e tij gjatë fushatës zgjedhore 2020, të cilët e kanë akuzuar se ka përfituar nga lidhjet politike të të atit. Presidenti dhe përkrahësit e tij kanë ngritur akuza të shumta për korrupsion në adresë të Hunter Bidenit, lidhur me punën e tij në Ukrainë, por pa ofruar prova. Në periudhën për të cilën flasin këto pretendime për parregullsi dhe shkelje, babai i tij ishte nënpresident dhe kryesonte marrëdhëniet e administratës Obama me Ukrainën.
Diskutime rreth kësaj post