Mediat italiane bëjnë me dije se një shpërthim është regjistruar në orët e para të mëngjesit të sotëm në një pallat pesëkatësh në komunën Sesto San Giovanni në provincën e Milanos.
Mësohet se 6 persona janë plagosur mes tyre dhe 5 anëtarët e një familje shqiptare.
Sipas hetimeve të para shpërthimi ka ndodhur në apartamentin e një 73 vjecari italian i cili ka pësuar djegje të rëndë në trup. Banesa e tij është shkatërruar plotësisht.
Në apartamentin ngjitur me të strehohej një familje emigrantësh shqiptarë me 5 anëtarë; një cift i ri në moshën 35 e 32 vjeç, prindërit e njërit prej tyre në moshën 68 e 62 vjec e djali 10 muajsh.
Verifikimet e mëngjesit të sotëm kanë bërë që pallati është deklaruar i pabanueshëm e autoritetet italiane kanë evakuuar të gjithë banorët duke i strehuar në hotelet e zonës.
Bëhet me dije se të plagosurit kanë marrë plagë djegie në trup e ndodhen jashtë rrezikut për jetën.
Ende nuk ka një deklaratë zyrtare mbi motivin e këtij shpërthimi por sipas Roberto Di Stefano kryetarit të Bashkisë së komunës Sesto San Giovanni, hetimet e para hedhin dyshimin e shpërthimit të një tubature gazi.”
“Shpërthimi i ngjante një bombe” kanë rrëfyer banorët e pallatit. Ishim në gjumë e na ka trembur shumë.”
Diskutime rreth kësaj post