DETAJE TRONDITËSE: Jastëk mbi fytyrë dhe goditje në kokë, 28-vjeçarja dyshohet se sulmoi gjyshen e burrit

**28-vjeçarja dyshohet se tentoi ta vriste gjyshen e bashkëshortit, Prokuroria nis hetimet**

Prokuroria Themelore Publike në Shkup ka nisur hetim ndaj një 28-vjeçareje, e cila dyshohet se gjatë një rasti të dhunës në familje është përpjekur t’i marrë jetën gjyshes së bashkëshortit, me të cilën jetonte në të njëjtën banesë.

Sipas Prokurorisë, ngjarja ka ndodhur më **15 gusht**, në një banesë në rrugën “Boris Bojadžiski”. E dyshuara dyshohet se ka hyrë në dhomën ku po pushonte gruaja 88-vjeçare, ka mbyllur derën dhe është ulur mbi të, ndërsa dyshohet se i ka vendosur një jastëk mbi fytyrë dhe e ka goditur në kokë.

Sipas versionit të Prokurorisë, sulmi ka përfunduar pasi e dyshuara ka menduar se gruaja kishte ndërruar jetë. Më pas, ajo i ka treguar bashkëshortit për ngjarjen, ndërsa ai ka njoftuar policinë.

E moshuara është dërguar për trajtim mjekësor, ku janë konstatuar lëndime në kokë dhe nofull, si dhe hematoma.

Prokuroria e dyshon 28-vjeçaren për **tentativë vrasjeje gjatë dhunës në familje** dhe ka kërkuar caktimin e masës së paraburgimit, duke përmendur rrezikun e përsëritjes ose përfundimit të veprës.

Hetimet për rastin janë në vazhdim. E dyshuara konsiderohet e pafajshme deri në një vendim përfundimtar të gjykatës.