Juristi i mirenjohur shqiptar Kreshnik Spahiu ka shprehur shqetësimin për ndotjen e Plazhit të Adriatikut. “Sot, plazhi i Adriatikut është pa asnjë mëdyshje territori më i ndotur në Shqipëri”, shkruan Spahiu teksa i bën thirrje Ministrisë Mjedisit dhe Turizmit të ndërhyjë urgjentisht.
Postimi i Spahiut:
“Plazhi i Adriatikut bekim i natyrës dhe peng i pushtetit!
Vetëm 2 kilometra nga qyteti i Mamurrasit ndodhet fshati Adriatik, një dhuratë bujare, që natyra ia ka dhënë Kurbinit, por që njeriu me paaftësinë dhe neglizhencën e tij, e ka masakruar.
Segmenti rrugor që lidh Fushë – Mamurrasin me fshatin Adriatik, është lënë në mëshirë të fatit, ndërsa ky fshat ka një plazh magjepsës prej 5 km, ndër më të bukurit në Ballkan, i cili është kthyer në një vendgrumbullim mbetjesh urbane.
Sot, plazhi i Adriatikut është pa asnjë mëdyshje territori më i ndotur në Shqipëri.
Do të mjaftonte vetëm ndërtimi i një rruge me parametra bashkëkohor, që investitorët nga mbarë Ballkani të dyndeshin në këtë destinacion, për të ngritur resorte turistike.
Kjo do pasohej me hapjen e mijëra vendeve të reja të punës në sektorin e hoteleri – turizmit dhe do të ishin një zinxhir biznesesh në Kurbin, që do të përfitonin nga zhvillimi i turizmit në këtë plazh.
Ndonëse dëmi i shkaktuar nga neglizhenca është i jashtëzakonshëm, mundësitë dhe shpresat që ky plazh përrallor të rikthehet në identitet, nuk janë shuar.
Duhet vetëm këmbëngulje dhe një projekt ambicioz, ngritja e një grupi pune, që të ushtrojë “presion” tek pushteti lokal dhe ai qendror, për akordimin e një fondi për rikonstruksionin e rrugës me parametra bashkëkohorë, promovimi në mediat vendase dhe të huaja i këtij destinacioni dhe bindja e investitorëve të huaj për potencialin që ka ky plazh.
Ministria e Mjedisit dhe Turizmit urgjentisht duhet të kthejë vëmendjen nga Kurbini, që është një trevë që ka potenciale të jashtëzakonshme për zhvillimin e turizmit në të katër stinët e vitit.” tha ai.
Diskutime rreth kësaj post