Në Shqipëri Prokuroria Posaçme e Shkallës së parë për Korrupsionin dhe Krimin e organizuar ankimoi sot vendimin e Gjykatës së posaçme të Shkallës së parë e cila nuk pranoi kërkesën për për rihapjen e procesit gjyqësor ndaj ish Ministrit të Mbrojtjes Fatmir Mediu, lidhur me shpërthimin e ndodhur 13 vite me parë në një depo ushtarake në Gërdec
SPAK e paralajmëroi këtë lëvizje menjëherë pas vendimit të Gjykatës, duke e cilësuar atë si “të pabazuar në ligj”.
Prokuroria e Posaçme këmbëngul se për shkak të ndryshimeve ligjore të cilat hoqën imunitetin si pengesë për ndjekjen penale të deputetëve, nuk ekziston më motivi që çoi Gjykatën e Lartë në vitin 2009, që të pushonte çështjen ndaj ish ministrit të Mbrojtjes.
FIllimisht kërkesa e SPAK u shqyrtua nga vetë Gjykata e Lartë e cila ja kaloi si kompetencë Gjykatës së Posaçme të Shkallës së Parë.
Kjo e fundit, më 27 Korrik shpjegoi se organi i akuzës, kishte patur mundësi që pas vendimit të Gjykatës së Lartë në vitin 2009 të kërkonte sërish autorizimin e parlamentit për ndjekjen penale të zotit Mediu, por dhe pas vitit 2012 kur pengesa e imunitetit u hoq.
Gjykata vërejti gjithashtu se vepra penale për të cilën është ngritur akuzë ndaj zoti Mediu, tanimë është parashkruar, duke qenë se kanë kaluar mbi dhjetë vjet.
Ndërsa një numër i madh personash u vunë nën akuzë, ish ministri i Mbrojtjes, ishte i vetmi që i shpëtoi gjykimit për ngjarjen në të cilën humbën jetën 26 persona, mes të cilëve dhe fëmijë./VOA
Diskutime rreth kësaj post