**BE reagon për çështjen e Vlora Hysenit: Besim te SPAK për hetimin e krimit të organizuar**
Bashkimi Evropian nuk ka komentuar drejtpërdrejt dosjen ndaj ish-drejtueses së SHISH, Vlora Hysenit, apo masën e sigurisë **“arrest në shtëpi”** të vendosur ndaj saj.
I pyetur për këtë çështje, zëdhënësi i Komisionit Evropian për zgjerimin, Guillaume Mercier, deklaroi se Brukseli nuk komenton raste që janë ende në proces gjyqësor apo hetim.
Megjithatë, Mercier përcolli një mesazh të qartë në lidhje me punën e institucioneve shqiptare të drejtësisë, duke theksuar se Komisioni Evropian ndjek nga afër zhvillimet në fushën e shtetit të së drejtës, reformës në drejtësi dhe luftës kundër krimit të organizuar dhe korrupsionit.
**“Ne nuk komentojmë çështje që janë në proces, por ajo që mund të themi është se ne i ndjekim nga afër zhvillimet që lidhen me shtetin e së drejtës, veçanërisht reformat në drejtësi dhe luftën kundër krimit të organizuar dhe korrupsionit, fusha në të cilat Shqipëria ka bërë përparim të konsiderueshëm”**, u shpreh Mercier.
Në vijim, zëdhënësi i Komisionit Evropian shprehu mbështetjen e institucionit për **SPAK-un**, duke deklaruar se Brukseli ka besim në aftësinë e strukturës për të hetuar dhe ndjekur penalisht rastet e krimit të organizuar.
**“Kemi besim të plotë tek aftësia e Strukturës së Posaçme Kundër Korrupsionit dhe Krimit të Organizuar, e njohur si SPAK, për të zbuluar, hetuar dhe ndjekur penalisht krimin e organizuar”**, deklaroi ai.
Qëndrimi i BE-së nuk përbën një vlerësim mbi fajësinë apo pafajësinë e Vlora Hysenit dhe as mbi provat që lidhen me çështjen konkrete. Komisioni Evropian ka bërë të ditur gjithashtu se kontaktet me autoritetet shqiptare vijojnë në kuadër të bashkëpunimit institucional.
Ndërkohë, procedurat dhe hetimet për rastin e Hysenit vijojnë pranë institucioneve përkatëse të drejtësisë shqiptare.
Diskutime rreth kësaj post