Kryetari i Lëvizjes Vetëvendosje, Albin Kurti është shprehur ditën e sotme se nëse do kishte një referendum për bashkimin Kosovë-Shqipëri, vota e tij do ishte pro.
Lidhur me këtë analisti Jusuf Thaçi tha se Kurti, si kryeministër i ardhshëm i Kosovës duhet të punojë për ta jetësuar këtë projekt.
“Si kryeministër i ardhshëm, z. Kurtit i takon që të punojë për ta jetësuar këtë projekt ose ide dhe jo vetëm të jetë votues pasiv i një referendumi potencial”, tha ai për Euronews Albania.
Pavarësisht kësaj deklarate, e cila ka ngjallur entuziazëm në të dyja anët e kufirit, analisti Thaçi thotë se bashkimi me Shqipërinë nuk e sheh si prioritet të Kurtit, të paktën në mandatin e parë në krye të qeverisë.
“Nuk besoj se në mandatin e parë do jetë një prej prioriteteve, sepse Kosova ballafaqohet me një sërë problematikash në rrafshin e brendshëm, pastaj dialogu me Serbinë, dhe vetëm kur të konsolidohen këto çështje dhe pasi të sigurohet sovraniteti i plotë i Kosovës, atëherë besoj se duhet të vinte diskutimi bashkimi kombëtar dhe modalitetet e këtij bashkimit, në koordinimin të Shqipërisë dhe partnerëve dhe me anë të metodave demokratike”, tha ai.
Diskutime rreth kësaj post