Dy mesazhe kërcënuese janë gjetur në celularin e biznesmenit Tofik Hyka, të cilit iu bë atentat paraditen e së mërkurës, shkruan “Panorama”. Burime nga Policia thanë dje se nga verifikimi i tablateve telefonike, janë zbuluar edhe SMS-të, që deri tani nuk dihen se nga kush janë dërguar.
Numrat kanë rezultuar të regjistruar me emra fiktivë dhe Policia po kryen verifikimet e nevojshme për identifikimin e këtyre personave. Por nga aq sa bëjnë të ditur burimet nga grupi hetimor, tekstet e mesazheve kërcënuese flisnin për shuma të konsiderueshme parash, që sipas të dhënave, biznesmeni 56-vjeçar u kishte borxh disa personave.
Kërcënimet e mbërritura në drejtim të tij u bënë të ditura për grupin hetimor nga disa të afërm të biznesmenit, edhe pse shoferi i tij nuk konfirmoi faktin se shefi i tij ndjehej i rrezikuar nga dikush.
Në bazë të deklarimeve që kanë dhënë në Polici persona që e njihnin 56- vjeçarin Hyka, por edhe disa të afërm nga Tirana, ka dyshime se biznesmeni jepte para me fajde. Burimet thanë se për shkak të borxheve, ai detyrohej të merrte shuma të konsiderueshme parash te persona të ndryshëm, të cilat ua jepte në formën e një “page” mujore, por me interesa shumë të larta.
Një pjesë të këtyre parave ai i ka investuar duke rritur biznesin e tij, por sipas burimeve nuk kanë qenë të mjaftueshme për shlyerjen e borxheve. Kjo mund t’i ketë sjellë probleme me ndonjë prej personave që u ka marrë para në këtë formë, madje së fundmi ka marrë edhe kërcënime.
Kështu kanë deklaruar disa të afërm të tij, dy ditë më parë gjatë marrjes në pyetje. Deklarime që pas verifikimeve rezultuan të sakta.
Diskutime rreth kësaj post