Kreu i Bindjes Demokratike, Astrit Patozi është përfshirë në debatin e ditëve të fundit mes kryeministrit Edi Rama dhe kreut të Partisë Demokratike, Lulzim Basha sa i takon pasurisë së këtij të fundit dhe familjareve të tij.
Zoti Patozi ka publikuar në rrjetet sociale fotot e projektit të vilës që kërkon të ndërtojë kunati i kryedemokrati Lulzim Basha, ndërsa shprehet se SPAK duhet të hetonte dhe dërgonte shpejt në gjykatë këtë çështjen e vilës së Farkës. Madje sipas Patozit, Prokuroria e Posaçme, mund të jepte një kontribut të madh për interesin publik, që mund të shërbente sadopak edhe për zgjedhjet e 25 prillit.
“SPAK-u mund të jepte një kontribut të madh për interesin publik, që mund të shërbente sadopak edhe për zgjedhjet e 25 prillit. Mjafton të hetonte dhe dërgonte shpejt në gjykatë këtë çështjen e vilës së Farkës. Që të paktën të mos kishim njëkohësisht dy gjela, duke kënduar majë të njëjtit pleh dhe për të njëjtën temë. Sepse njëri prej tyre duhet të dënohet dhe certifikohet si mashtrues me letra, mundësisht përpara se të votohet për Parlamentin e ardhshëm. Dhe këtu bëhet fjalë për raportin, që kanë me të vërtetën në kohë fushate dhe, jo për pasuritë apo lekët, se për ato nuk kemi dyshim që të dyja palët nuk e kanë problem. Ngaqë bashkë i kanë bërë dhe bashkë po i shtojnë, pak rëndësi ka statusi politik, nëse janë në qeveri apo në opozitë. Jo për gjë, por e vërteta alternative nuk ekziston. Ajo është thjesht një shpikje e të marrëve dhe sharlatanëve politikë”, deklaroi ai.
Më tej kreu i Bindjes Demokratike, Astrit Patozi mes ironisë thekson se dy gjela nuk mund të këndojnë majë të njëjtit pleh.
“Ndërkohë që publiku ka të drejtë ta mësojë përpara 25 prillit se cili prej dy gjelave po gënjen në mes të sheshit, ditën për diell dhe pa iu dridhur fare qerpiku, kur na ndajnë vetëm tre muaj nga dita finale e verdiktit të sovranit”, nënvizoi kreu i Bindjes Demokratike, Astrit Patozi.
Diskutime rreth kësaj post