Ish-drejtori i Burgjeve, Artur Zoto është arrestuar pasditen e sotme nga policia. Arrestimi i tij është bërë pas një vendimi të dhënë nga Gjykata e Krimeve të Rënda.
Me kërkesë të Prokurorisë së Krimeve të Renda, Gjykata e Krimeve ka vendosur masën e sigurisë “arrest me burg” për ish-drejtorin e Përgjithshëm të Burgjeve, Artur Zoto.
Zota është i dyshuar për “korrupsion pasiv”, në kuadër të hetimit të nisur kohë më parë, ku u arrestua edhe ish-zëvendësdrejtori i Burgjeve, Iljaz Labi.
Pas kërkesës së Prokurorisë, urdhri i arrestit është zbatuar nga Policia e Shtetit pasditen e sotme.
***
Artur Zoto ka lindur në Përmet, më 02.10.1974.
Nga viti 1993- 1996 ka kryer studimet pranë Akademisë së Policisë, Tiranë. Në vitin 2005 nis studimet pas- universitare në fushën e Kriminologjisë në Universitetin Leicester, në Mbretërinë e Bashkuar.
Ndërsa në vitet 2009- 2010 merr titullin MA për Sigurinë Globale, për Studimet Master me kohë të plotë, përfunduar me rezultatin “Merit” në Universitetin e Sheffield-it në Mbretërinë e Bashkuar.
Ai është vlerësuar me Çertifikatë Mirënjohje nga misioni PAMECA.
Gjatë viteve 2006- 2013 ka punuar si Koordinator Kombëtar i Luftës kundër Kultivimit të Bimëve Narkotike; Specialist për Hetimin e Aseteve Kriminale; Specialist në Sektorin e Planifikimit Strategjik; Shef i Sektorit Kundër Trafikimit; Specialist në Sektorin kundër Lëndëve Narkotike, pranë Drejtorisë së Përgjithshme të Policisë së Shtetit.
Ndërsa në vitet 2005- 2006, ka qenë anëtar i grupit të punës për zhvillimin e strategjisë 7- vjecare të Policisë së Shtetit (2007- 2013), atashuar pranë misionit PAMECA.
Gjatë viteve 2003- 2005 ka mbajtur detyrën e Shefit të Komisariatit Nr. 3 në Drejtorinë e Policisë së Qarkut Tiranë dhe nga 2001- 2003 ka shërbyer si Specialist në Sektorin për Hetimet e Veçanta, atashuar në Prokurorinë e Përgjithshme, Drejtoria kundër Krimit të Organizuar. Gjatë viteve 1996- 2001 ka mbajtur detyrën e Specialistit në Sektorin kundër Terrorizmit; në Sektorin Kundër Lëndëve Narkotike dhe kundër Krimeve në Drejtorinë e Policisë Qarkut Tiranë dhe Fier.
Në tetor 2013 Artur Zoto emërohet në postin e Drejtorit të Përgjithshëm të Burgjeve në Shqipëri.
Diskutime rreth kësaj post