Analisti Milaim Zeka e sheh si një gabim të madh refuzimin e kryeministrit të Kosovës, Albin Kurti, të ofertës për t’iu bashkuar nismës ‘Open Balkan’.
Takimi i radhës mes tre vendeve që janë pjesë e “Open Balkan”, Shqipëria, Serbia dhe Maqedonia e Veriut do të zhvillohet në Beograd, dhe sipas Milaim Zekës, kjo do ishte një mundësi e mirë për Albin Kurtin, për të përfaqësuar Kosovën si një shtet të pavarur në mes të Beogradit.
“Unë nuk e kuptoj se pse Albin Kurti refuzon nismën ‘OPEN BALKAN’. Por jam i bindur se Vuçiç do ta ndjente vetën të djersitur dhe shumë keq nëse do të ulej në të njëjtën tryezë me Albin Kurtin. Po të isha kryeministër i vendit do të merrja pjesë në të gjitha organizimet e ‘OPEN BALKAN’. Nëse Albin Kurti sot do ishte në Beograd, do t’ia thonte në sy presidentit serb, se Kosova është e vdekur për Serbinë. Ne e kemi fituar lirinë”, tha Zeka për emisionin ‘Breaking’.
Sipas analistit, Albin Kurti e ka humbur mbështetjen në Kosovë. Duke iu referuar zgjedhjeve të fundit lokale, ku në raundin e parë, VV nuk mori asnjë komunë, Zeka tha se nëse Kurti humb edhe Prishtinën, duhet të japë dorëheqjen.
“Shqiptarët e dënuan Albin Kurtin për 8 muaj. Nuk fitoi asnjë komunë në raundin e parë. Ky është ndëshkimi më i madh. Shpresoj që ndëshkimin e dytë ta marrë tani në balotazh. Nëse tani humb Prizrenin dhe Prishtinën, nëse ka kod moral duhet të japë dorëheqjen”, tha Zeka.
Diskutime rreth kësaj post