Akuzat e PD për ‘oligarkët’, kryeministri Rama i përgjigjet ‘dhëmbë për dhëmbë’ opozitës

Kryeministri Edi Rama iu është përgjigjur sërish akuzave të opozitës se ‘oligarkët’ kanë bërë miliona nga qeveria e tij. Përmes një postimi në rrjetet sociale Rama ka publikuar statistikat që tregojnë se ‘oligarkët’ kanë paguar më shumë taksa gjatë këtyre viteve të fundit.

Në reagimin e tij, kryeministri Rama thekson se 100 më të pasurit kanë paguar 458% më shumë taksa në 5 vitet e fundit, se sa në 8 vitet bashkë të qeverisjes së PD.

“Meqë disa prej jush shkruan dje këtu se 10 më të mëdhenjtë paskan paguar më shumë se paskeshin marrë më shumë punë nga shteti (e pavërtetë), po ju vë sot para syve faktin tjetër kokëfortë, se 100 më të pasurit kanë paguar 458% më shumë taksa në 5 vitet e fundit, se sa në 8 vitet bashkë të qeverisjes së dështakëve që dinë veç të gënjejnë, të shajnë e të bëjnë rrëmuja pa lidhje! #FakteKokëforta”, – shkruan Rama.