Kreu i Grupit të PS Taulant Balla, në një komunikim për mediat u shpreh se nuk ka asnjë shkelje Kushtetuese të deputetes Olta Xhaçka.
Gjithashtu ai theksoi se në momentin që do të përfundojë gjithë procesi do të ketë një vendim të Kuvendit.
“Unë e kam thënë shumë herë përgjatë mbledhjeve, s’mund të lemë asnjë problematikë, apo verigë që të thonë u shkel rregullorja e Kuvendit. Çdo lloj shkelje përgjatë procesit mund të sjellë probleme në proces. Ne nuk hymë në thelb, ne hymë dhe shohim nëse janë plotësuar të gjitha elementët që cënon Kushtetutën. Është një flluskë sapuni. Ju u njohët me faktin se deputetja Olta Xhaçka nuk ka kryer asnjë shkelje që hyn te neni 73 i Kushtetutës. Tashmë kemi edhe një kërkesë tjetër, ato janë bashkuar, do ndiqet procedura dhe sa më shpejt të jetë e mundur Kuvendi do të shprehet lidhur me këtë kërkesë. Këtu bëhet fjalë për një procedurë që nis nga zbrazëtia e agjendës politikë të opozitës. Nuk ka gjë në kërkesën e tyre. Nuk ka shkelje kushtetuese sa i përket përfshirjes në një sipërmarrje financiare të deputetes Olta Xhaçka, zero shkelje. Tani ka ardhur edhe Agron Shehaj me 14 deputetë të tjerë, edhe ai do të duhet të dëgjohet… Në Shqipëri ka shumë liri mediash sepse fakti që kemi një diversitet kaq të madh krahasuar me vendet të tjera tregon që ka liri. Unë miqësisht do kërkoja që kërkesat të shtrihen edhe në një kuadër më të gjerë…Në fakt është edhe çështje e komunikimit, rasti në fjalë ka qenë një rast që për historinë e këtij vendi të vogël është gjë e madhe. Unë thashë që ju jeni ekspertë të kësaj fushe dhe secili nga ne bën detyrën e vet. Edhe ne kemi të gjithë të drejtën të themi atë që mendojmë jo atë që doni ju, por atë që është në interes të publikut”, tha ai.
Diskutime rreth kësaj post