**Kamerat hedhin dritë mbi plagosjen e 20-vjeçarit në parkingun e Ferizajt**
**FERIZAJ** – Një 20-vjeçar ka mbetur i plagosur nga arma e zjarrit në orët e para të mëngjesit në një parking në rrugën “12 Qershori” në Ferizaj.
Sipas informacioneve të raportuara nga Sinjali, rreth orës 03:40, Emergjenca në Ferizaj ka njoftuar për një person të plagosur me armë zjarri. I riu, i identifikuar si **Florent Jakupi**, fillimisht është dërguar për trajtim në Ferizaj dhe më pas është transferuar në QKUK në Prishtinë.
Në fazat e para, rrethanat e plagosjes nuk kanë qenë të qarta. Një punëtor i parkingut ka deklaruar se kishte parë katër persona të hynin në objekt dhe më pas kishte dëgjuar një krismë.
Në vendngjarje, në afërsi të parkingut, është gjetur një çantë brenda së cilës ndodhej një armë, e cila është sekuestruar nga autoritetet.
**Pamjet e kamerave të sigurisë kanë ndihmuar në sqarimin e rrethanave të incidentit.** Sipas informacioneve të raportuara nga Sinjali, në pamje shihet 20-vjeçari duke lëvizur në parking me një çantë krahu të vendosur në pjesën e gjoksit. Në një moment ai dyshohet se rrëshqet dhe bie në tokë, ndërsa arma që ndodhej brenda çantës dyshohet se është shkrepur gjatë përplasjes, duke e plagosur në këmbën e majtë.
Sipas të njëjtave burime, vëllai i të riut ka deklaruar se para incidentit ata kishin qenë së bashku me dy persona të tjerë në disa lokale në qytet dhe më pas kishin shkuar në parking për të marrë automjetet.
Arma e gjetur në çantë raportohet të jetë e tipit **TT**. Gjatë kontrollit të çantës është gjetur dhe sekuestruar edhe një sasi e vogël e një substance të dyshuar si marihuanë.
Ndërkohë, gjendja shëndetësore e 20-vjeçarit është raportuar e rëndë. Sipas informacioneve të mëvonshme mjekësore të publikuara nga burimi, predha ka prekur një arterie kryesore të këmbës së majtë.
Për rastin është iniciuar procedurë për veprat penale të **“Posedimit të paautorizuar të narkotikëve, substancave psikotrope ose analoge”** dhe **“Vetëlëndimit”**, ndërsa hetimet po vazhdojnë për të sqaruar plotësisht rrethanat e ngjarjes.
**Personat e përmendur në këtë raport konsiderohen të pafajshëm deri në një vendim të formës së prerë nga gjykata.**
Diskutime rreth kësaj post