Një 25-vjeçar me origjinë nga Kosova, banues në Treviso të Italisë, është dënuar me **dy vjet e katër muaj burgim**, pas një procesi gjyqësor lidhur me përndjekje, kërcënime dhe fyerje ndaj xhaxhait dhe familjarëve të tij.
Sipas mediave italiane, i riu ishte arrestuar më 11 nëntor 2025, pas një serie episodesh që kishin zgjatur rreth një muaj e gjysmë. Sipas akuzës, ai ishte paraqitur në mënyrë të përsëritur në lokalet e xhaxhait të tij në Paese dhe Susegana, ku dyshohet se kishte kërcënuar dhe fyer familjarët.
Prokuroria e kishte lidhur konfliktin me një mosmarrëveshje për pronësinë e një pjese të pasurisë familjare në Kosovë. Sipas akuzës, gjatë kësaj periudhe kishte pasur edhe kërcënime, publikime në rrjetet sociale dhe dëmtime të pajisjeve, mobilieve dhe automjeteve të përdorura për aktivitetin e familjarëve.
25-vjeçari ishte përballur gjithashtu me akuza për tentativë zhvatjeje dhe grabitje. Për akuzën e grabitjes, **gjykata e shpalli të pafajshëm**.
Përveç dënimit me burgim, gjykata ka vendosur që pas përfundimit të tij, i riu të qëndrojë edhe **një vit nën mbikëqyrje në një qendër trajtimi**.
Vendimi është mbështetur edhe në një ekspertizë psikiatrike, sipas së cilës aftësia e tij për të kuptuar dhe marrë vendime ishte e reduktuar, ndërsa ekspertiza e ka vlerësuar si person me rrezikshmëri sociale.
Gjykata ka njohur gjithashtu për katër familjarë, përfshirë xhaxhain, një **kompensim të përkohshëm prej 30 mijë eurosh**. Shuma përfundimtare e dëmshpërblimit pritet të përcaktohet nga gjykata civile.
Diskutime rreth kësaj post