Dhomat e Specializuara të Kosovës në Hagë kanë vendosur të ndryshojnë pjesërisht kufizimet për vizitat jo të privilegjuara ndaj ish-presidentit të Kosovës, Hashim Thaçi.
Sipas njoftimit të Dhomave të Specializuara, më 21 shtator 2026 gjykatësi i vetëm rishikoi kufizimet për vizitat ndaj Thaçit dhe vendosi të heqë ndalimin për disa persona, ndërsa për të tjerë kufizimet mbeten në fuqi.
Në mesin e personave ndaj të cilëve është hequr ndalesa janë **Milaim Ahmetaj, Milaim Cakiqi dhe Avni Kastrati**, ndërsa emrat e tre personave të tjerë nuk janë bërë publikë në versionin e redaktuar të vendimit.
Megjithatë, vizitat e këtyre personave do të jenë subjekt i monitorimit. Sipas vendimit, masa lidhet me shqetësimet e mëparshme për komunikimin e mundshëm të informacioneve konfidenciale gjatë vizitave.
Gjykatësi ka urdhëruar që të raportohet çdo tentativë për komunikimin e informacioneve konfidenciale, dhënien e udhëzimeve lidhur me dëshmitarët apo çdo shkelje tjetër të rregullave të objektit të paraburgimit.
Në anën tjetër, ndalesa për vizitat jo të privilegjuara mbetet në fuqi për **Artan Behramin, Blerim Shalën, Ismail Sylën dhe Vllaznim Kryeziun**.
Sipas vendimit, gjykatësi ka vlerësuar se një pjesë e rreziqeve që kishin çuar në vendosjen e kufizimeve është zvogëluar gjatë zhvillimit të procedurave. Në vendim theksohet se dëshmitarët e çështjes janë identifikuar dhe janë dëgjuar.
Dhomat e Specializuara kanë bërë të ditur se kufizimet për vizitat do të vazhdojnë të rishikohen për të vlerësuar nëse mbeten të nevojshme dhe proporcionale.
Vendimi lidhet me çështjen për administrimin e drejtësisë, e cila është zhvilluar veçmas nga gjykimi kryesor ndaj Thaçit dhe bashkëakuzuarve të tij. Në çështjen kryesore, më 16 shtator 2026, Paneli i Gjykimit shpalli vendimin ndaj Thaçit, Kadri Veselit, Rexhep Selimit dhe Jakup Krasniqit.
Diskutime rreth kësaj post