Detaje të reja janë bërë publike lidhur me komunikimet mes ish-drejtueses së SHISH, Vlora Hyseni, dhe biznesmenit Ergys Agasi. Sipas materialeve të përfshira në dosjen e SPAK, Hyseni dyshohet se i ka përcjellë Agasit informacione lidhur me lëvizjet e strukturave të sigurisë.
Në një prej komunikimeve të përfshira në dosje, Hyseni i kërkon Agasit të mos përdorë një numër tjetër telefoni, duke pretenduar se ai mund të ishte nën përgjim.
“Shpirt, mos e përdor atë numrin tjetër sonte se çunat ia kanë çu veshin. Flej rehat. Të du!”, thuhet në mesazh, sipas dosjes.
Në vijim të komunikimit, Agasi e pyet nëse ekzistonte ndonjë rrezik për persona të afërt me të. Sipas materialeve të dosjes, Hyseni i është përgjigjur: “Krejt radarët e shtetit i fik për ty!”
Komunikimet janë pjesë e materialeve që SPAK po shqyrton në kuadër të hetimit për marrëdhënien mes dy personave dhe natyrën e informacionit që dyshohet se është shkëmbyer.
Ndërkohë, Hyseni pritet të paraqitet para Gjykatës së Posaçme, ku do të njihet me masën e sigurisë dhe do të ketë mundësi të japë shpjegime lidhur me çështjen.
Gjatë marrjes në pyetje nga hetuesit e SPAK, sipas dosjes, Hyseni ka deklaruar se Agasi ishte bashkëpunëtor i saj në kuadër të rrjetit të agjentëve të SHISH.
Prokuroria po verifikon rrethanat dhe natyrën e marrëdhënies mes tyre, ndërsa përgjegjësia e personave të përfshirë do të përcaktohet në përfundim të procedurave ligjore.
Diskutime rreth kësaj post