Partia Demokratike i ka akuzuar sërish Sekretarin e Përgjithshëm të Partisë Socialiste, Taulant Balla se po u bën presion qytetarëve që marrin ndihmë ekonomike. Drejtuesi politik i PD-së në Elbasan Gazment Bardhi deklaroi ditën e djeshme se e kishte kallëzuar Ballën në SPAK për këtë arsye, ndërsa PD në reagimin e sotëm thotë se do të bëjë publike evidencat e dorëzuara në Prokurori.
Sipas PD, Taulant Balla nuk del dot në qytetin e Elbasanit për shkak të mashtrimeve elektorale dhe abuzimit me pushtetin.
Deklarata e PD:
“Taulant Balla është mësuar që të bëjë edhe shkelje më të rënda se kjo për të cilën është kallëzuar në SPAK, dhe tja hedhë, sepse ka pasur mbrojtjen e Edi Ramës. PD ka depozituar prova konkrete se si “Shtabi i tij i Peshkut” intimidon personat që marrin ndihmë ekonomike, përmes telefonatave.Taulant Balla nuk del dot në qytet, dhe nuk mund të shfaqet para qytetarëve për shkak të mashtrimeve elektorale dhe abuzimit me pushtetin, ndaj vepron me metoda presioni ndaj qytetarëve në nevojë. Ne do të bëjmë publike evidencat që kemi dorëzuar në prokurori. Do të merremi me faktet.
Deklaratat që burojnë nga dëshpërimi i humbjes së sigurtë, dhe nga angazhimi që kemi për të hetuar aferat korruptive sapo të vijmë në pushtet, le t’i mbajë për t’u ngushëlluar edhe këto pak ditë që i kanë ngelur. Pas 25 Prillit, Taulant Balla do të jetë një subjekt i drejtësisë, pasi të jetë ndëshkuar me votën masive në gjithë Qarkun e Elbasanit, dhe pasi të mos ketë bablok që e mbron para ligjit”, thuhet në reagimin e PD.
Diskutime rreth kësaj post