Deputetja socialiste Evis Kusho, e cila është njëherësh edhe pedagoge prej shumë vitesh, shpreh bindjen e plotë se dialogu është rruga më e mirë për zgjidhje dhe për vendosjen e një komunikimi të përhershëm që adreson në mënyrë të vazhdueshme shqetësimet e studentëve dhe të stafit pedagogjik. Kushi thekson se ky moment duhet të shënojë një kthesë të rëndësishme për të gjithë së bashku.
Të dashur studentë,
E kemi përsëritur pa pushim që jemi aleatë dhe ju mbështesim fort në kauzën tuaj për një arsim të lartë më cilësor në të gjithë komponentët e tij. Jemi të angazhuar maksimalisht për të punuar në të gjitha kërkesat që keni paraqitur, madje edhe më shumë se kaq. Por kam një pyetje për ju. E si mund t’i realizojmë këto kërkesa pa dialog dhe bashkëpunim? Po marr vetëm një shembull të thjeshtë. Ju me shumë të drejtë kërkoni përmirësim të kushteve të konvikteve në të gjitha universitetet e vendit. Ne absolutisht jemi shumë dakord, por problemi është se çfarë parashikoni ju konkretisht në këtë pikë dhe kur e prisni ndryshimin? Për ne do ishte shumë e thjeshtë të themi PO dhe pastaj të bëjmë sa mundemi. Por unë nuk mendoj që kjo është zgjidhja. Kjo mund të ishte zgjidhja për të bindur studentët dhe për të shpërndarë protestën, por ky nuk është aspak qëllimi ynë. Përkundrazi. Ne duhet të biem dakord për çfarë do të bëjmë, ku do të investojmë, sa do të investojmë dhe brenda cilit afat. Dhe kjo pyetje vlen edhe për tarifat, edhe për rritjen e buxhetit, por edhe për shumë pika të tjera, që duhet të jenë objektivat dhe hapat e punës tonë të mëtejshme. Prandaj, e besoj fort që dialogu është rruga më e mirë për zgjidhje dhe për vendosjen e një komunikimi të përhershëm që adreson në mënyrë të vazhdueshme shqetësimet e studentëve dhe pedagogëve. Ky moment duhet të shënojë një kthesë të rëndësishme për të gjithë ne së bashku.
Diskutime rreth kësaj post