“Hashim Thaçi e Ramush Haradinaj janë mafiozë. Atyre nuk u intereson për popullin, por vetëm paratë, pushteti dhe fuqia”, ka thënë për Insajderin, ish-kongresisti amerikan, i cili për herë të parë e hapi në Kongres çështjen e Kosovës së bashku me kongresistin Tom Lantos.
Joseph DioGuardi është 78 vjeç. Shpreson të jetojë edhe 20 vjet. Kaq thotë se i duhen që çështjen shqiptare ta çojë në nivelin më të lartë të vëmendjes në Shtetet e Bashkuara të Amerikës.
Këtë premton se do ta bëjë pa bashkëpunuar me liderët shqiptarë të Kosovës, Shqipërisë e Maqedonisë. Dëshiron të qëndrojë larg tyre. Ka një arsye për këtë: i konsideron mafiozë.
“Hashim Thaçi e Ramush Haradinaj janë mafiozë. Atyre nuk u intereson për popullin, por vetëm paratë, pushteti dhe fuqia”, ka thënë për Insajderin, ish-kongresisti amerikan i cili për herë të parë e hapi në kongres çështjen e Kosovës së bashku me kongresistin Tom Lantos.
DioGuardi ka qenë përfaqësues i New Yorkut në Kongresin Amerikan gjatë viteve 1985-1989. Është republikan, që mbështet politika të ashpra kundër Rusisë. Është bërë njëri prej kritikëve më të mëdhenj të presidentit amerikan, Donald Trump, ndonëse e ka votuar dhe mbështetur atë në garën për president. Si kontabilist dhe financier i njohur, DioGuardi, druan se Trump do ta falimentojë Amerikën.
“Borxhi publik po rritet. Ekonomia jonë po varët nga paratë që nuk i kemi”, thotë ai.
DioGuardi, që është me prejardhje shqiptare nga fshati Greci i Italisë gjithë jetën ia ka kushtuar çështjes shqiptare. Edhe sot vazhdon të jetë aktiv në Amerikë si drejtues i Ligës Shqiptaro-amerikane.
“Kosova e Shqipëria nuk janë në gjendje të mirë për shkak të elitës politike e cila mendon që gjithçka mund të blihet me para. Ata u munduan të më blejnë edhe mua. Më ofruan para vetëm që të dilnin në fotografi me mua dhe të thoshin se kemi mbështetjen e DioGuardit”, thotë ai në një bisedë për Insajderin.
“Unë nuk dua dekorata. Nuk dua medalje. Nuk marrë dekorata nga liderë të korruptuar”, insiston ai.
DioGuardi akuzon presidentin, Hashim Thaçi se e ka paguar 2 milionë e 300 mijë euro, ish-senatorin Robert Dole vetëm që t’i shkruaj parathënien e librit të tij, New State, Modern Stateman”, i cili është shkruar nga gazetarët britanikë Suzy Jagger dhe Roger Boys.
“Presidenti Thaçi pagoi 2.3 milion euro të taksapaguesve kosovarë për kompaninë e z. Dole vetëm që t’i shkruaj një parathënie të librit”, shprehet ai.
Insajderi kishte raportuar në shkurt të vitit të kaluar se kompania amerikane “Alston Bird”, që këshillohet nga ish-senatori Bob Dole i cili e mban epitetin ‘miku i madh i shqiptarëve’, kishte fituar tender 2 milionë e 300 mijë eurosh nga Qeveria e Kosovës.
Kontrata parashihte që kompania amerikane e përfaqësuar nga Bob Dole, të kryejë disa shërbime speciale për Presidencën dhe Qeverinë e Kosovës.
Kontrata parashihte po ashtu që kompania amerikane të bëjë sigurimin e informacionit të shpejt dhe cilësor, sigurimi e këshillave dhe analizave të ndryshme, identifikimi e zyrtareve ndërkombëtar vendimtar në strategjinë e lobimit dhe ndikimin mbi sektorë dhe zyrtarë me qëllim realizimin e interesave te Republikës së Kosovës.
DioGuardi zotohet se kurrë nuk do të takojë asnjë liderë shqiptarë për shkak se siç thotë ai, janë të korruptuar. E përsërit epitetin “mafioz” për Thaçin. Ai kishte refuzuar për disa vjet edhe dekoratën e ndarë nga ish-presidenti, Ibrahim Rugova.
Disa vjet më vonë e kishte marrë këtë në një ndejë private në shtëpinë e Rugovës.
“Pak kohë para se të vdiste mora një telefonatë nga Rugova. Më tha, Joseph unë po vdes. Të lutëm eja tek unë. Unë shkova dhe e pash se tashmë po vdiste. E pranova dekoratën vetëm për faktin se ishte në fund të jetës”, kujton ai.
DioGuardi është duke shkruar një libër. Në të thotë se do të zbulojë detaje të punës që kishte bërë për Kosovën, duke nisur nga vizita e parë në Beograd dhe Prishtinë në vitin 1989 dhe akuzat për krime të Milosheviqit në Kosovë.
Ish-kongresisti thotë se arritja më e madhe e Kosovës është pavarësia e saj. Shprehet i bindur se kurrë Kosova nuk do të bashkohet me Shqipërinë. Ndryshimi i kufijve thotë se është i pamundur.
DioGuardi, pret ftesë nga shoqëria civile për ta vizituar Kosovën.
“Nuk dua të takojë politikanë. Nuk dua fotografi me ta. Nuk dua dekorata. Nuk dua para prej tyre. Dua të vi në Prishtinë dhe ta promovojë librin tim”, shprehet ai.
Diskutime rreth kësaj post