Ministri i Mbrojtjes Niko Peleshi, ka njoftuar sot se me vendim të Këshillit të Ministrave është rritur me 7% paga e ushtarakëve shqiptarë, nga ushtari bazë e deri te gradat më të larta. Vendimi hyn në fuqi menjëherë, nga data 1 Mars 2023.
“Kemi miratuar rritjen e pagë prej 7%, duke filluar nga sot, vendim që hynë në fuqi nga 1 Marsi. Për të gjithë ushtarakët, nga ushtari bazë e deri te gradat më të larta. Rritja e pagave nuk është më një fenomen spontan, por është bërë i përvitshëm, është premtuar nga kryeministri që do jetë i tillë.
Çdo vit do kemi rritje pagash, derisa ushtarakët tanë të kenë nivele dinjitoze. Pra, sot nëse je mbi 18 vjeç dhe je rekrutuar në Forcat e Armatosura, apo je student, menjëherë fillon pagesa 550 mijë lekë të vjetra dhe 100 mijë lekë të vjetra trajtim ushqimor.
Sot, me këtë vendim niveli mesatar i pagës është 870 mijë lekë. Vjet kemi bërë rritjen historike me 30% dhe ky 7% aplikohet mbi atë. Kjo është një arsye më tepër për të rinjtë që të bëhen pjesë e Forcave të Armatosura”, u shpreh Peleshi.
Më tej, ministri i Mbrotjes tha se nga nesër do të nisin rekrutimet e përvitshme për të rinjtë që duan të bëhen pjesë e Forcave të Armatosura.
“Nga nesër, në qendër të Tiranës do vendoset pika e lëvizshme e rekrutimit. Ka shumë arsye për të qenë pjesë e Forcave të Armatosura. Je pjesë e një institucioni të integruar në strukturat euroatlantike. Ke një trajtim të mirë me pagë. Por dhe shumë përfitime të tjera, nga trajtimet mjekësore, ushqimore dhe trajtimet me banesë për ushtarakët tanë që e kanë nevojë strehimin.”
Diskutime rreth kësaj post