Lajm i mirë për të punësuarit/ Rritet paga mesatare, ja sa është!

Rriten pagat në Maqedoninë e Veriut, paga mesatare neto arrin në 48.499 denarë

Paga mesatare mujore neto e paguar për punonjës në Maqedoninë e Veriut ka shënuar rritje gjatë korrikut 2026, duke arritur në 48.499 denarë, njoftoi Enti Shtetëror i Statistikave (ESHS).

Krahasuar me korrikun e vitit 2025, paga mesatare mujore neto për punonjës është rritur me 7.1%.

Sipas të dhënave zyrtare, rritja është ndikuar kryesisht nga shtimi i pagave mesatare në disa sektorë të ekonomisë.

Rritjet më të larta vjetore janë regjistruar në:

Aktivitetet financiare dhe të sigurimeve: 10.7%;
Furnizimi me ujë, menaxhimi i mbetjeve dhe aktivitetet e rehabilitimit të mjedisit: 10.4%;
Aktivitetet e pasurive të paluajtshme: 9.6%.

Ndërkohë, krahasuar me muajin qershor 2026, rritje e pagës mesatare mujore neto është evidentuar edhe në disa sektorë të tjerë.

Kështu, në aktivitetet profesionale, shkencore dhe teknike paga mesatare është rritur me 4.3%, në tregtinë me shumicë dhe pakicë, si dhe në riparimin e automjeteve dhe motoçikletave me 3.2%, ndërsa në sektorin e ndërtimit rritja ka qenë 2.3%.

Të dhënat pasqyrojnë pagën mesatare të paguar për punonjës gjatë korrikut 2026, sipas statistikave zyrtare të Entit Shtetëror të Statistikave.