Dje është kujtuar 8 Dhjetori, Dita e Rinisë, e cila solli ndryshimi në historinë e vendit tonë, pasi para 30 vitesh u shemb diktatura komuniste nga studentët e dhjetorit 1990.
Të gjithë politikanët uruan dhe kujtuan këtë ditë të shënuar, ndërkohë që kryedemokrati Lulzim Basha gjatë një takimi virtual ka shprehur mirënjohjen dhe respektin e thellë teksa tha se rinia është ajo e cila do të sjellë një ndryshim të madh përsëri.
“Sot ne përkujtojmë një ditë të madhe të ndryshimit të historisë sonë. 30 vite më parë ne bëmë kthesën e madhe dhe shembëm diktaturën më të egër komuniste në të gjithë Europën. Ky ndryshim u bë i mundur vetëm falë heronjve tanë, vetëm falë të rinjve të dhjetorit 1990, të cilëve u shkon sot mirënjohja dhe përkulja e thellë me respekt e imja. Ndryshimi i Shqipërisë do të vijë, ndryshimi i Shqipërisë mund dhe do të bëhet vetëm nga ju, vetëm nga rinia shqiptare”, tha Basha.
Ai u shpreh se si pasojë e keqqeverisjes shumë shqiptarë kanë humbur shpresën dhe besimin për një ndryshim. Por duke u dhënë një mesazh të fortë të rinjve ai gjithashtu rikujtoi se ndryshimi pozitiv mund të vijë vetëm nga ata.
“Si pasojë e keqqeverisjes shumë shqiptarë kanë humbur shpresën, kanë humbur besimin tek ndryshimi. Populli shqiptarë ka një histori të dhimbshme. Por në këtë histori të dhimbshme nuk ka ndodhur asnjëherë, asnjë ndryshim i madh pozitiv asnjë zhvillim i rëndësishëm pa protagonizmin e të rinjve shqiptarë. Ky është mesazhi kryesor që dua të rikujtoj sot, ky mesazh vlen dhe duhet të kujtohet edhe më fuqishëm”, u shpreh kryedemokrati.
Sipas tij qeveria nuk jep mundësitë e duhura që të rinjtë shqiptarë të shkëlqejnë brenda vendit, por i detyron ata të kërkojnë emigracionin si zgjidhje për jetën e tyre.
“Unë kam udhëtuar shpesh këto vite dhe kam patur privilegjin të takoj të rinj shqiptarë, që kanë kapur majat në nivele ndërkombëtare. Sepse këtu nuk ju jepet mundësia, këtu qeveria i detyron të largohen e të braktisin vendin. Por, të dashur miq, unë besoj nga thellësia e shpirtit, unë jam i bindur se ndryshimi i shumëpritur është plotësisht i mundur”, tha Basha.
Më tej ai falënderoi studentët dhe u shpreh se është merita e tyre që u shpall demokracia, që u fitua liria e shtypit, që ndryshoi ekonomia dhe që shqiptarët ishin të lirë për të udhëtuar. Madje, Basha vazhdoi duke thënë se nuk duhen harruar sakrificat e prindërve, vuajtjet apo humbjet e jetëve për të ardhmen që të gjithë të rinjtë e ëndërronin.
Diskutime rreth kësaj post