Zgjedhjet në Partinë Demokratike, Elisa Spiropali zbulon ‘paktin’ e bërë mes anëtarëve të PS

Ministrja e Shtetit për Marrëdhëniet me Parlamentin, Elisa Spiropali është shprehur se maxhoranca ka bërë një pakt për të mos komentuar asnjëherë zgjedhjet brenda Partisë Demokratike.

Spiropali tha në “Top Talk” se zgjedhjet në PD nuk do të kenë surpriza, pasi sipas saj, po bëhen me ‘stilin e vjetër’. Garën brenda selisë blu, Spiropali e konsideroi si një nga sherrnajat e pavlera dhe të pabukta, që Shqipëria prodhon çdo ditë.

“Dëgjo Denis, ne kemi bërë një premtim që nuk do të komentojmë për zgjedhjet brenda partisë së PD-së. Sidomos për sherrnaja të pavlera dhe të pabukta që prodhon Shqipëria me shumicë. Kjo gara pas humbjes ashtu është. Është shumë e shpejtë. Ne kemi festën e fitores, ata kanë zgjedhjet e humbjes. Ata po mbyllin sytë dhe sidomos kryetar i PD-së. PD-ja i ka humbur zgjedhjet. Ata i kanë pranuar rezultatet, do hyjnë në Kuvend. Patjetër që po. Kërkesat që kanë bërë ata vazhdimisht për rinumërim, kanë provuar se nuk ka pasur manipulime, por kjo është një temë tjetër”, tha Spiropali.